Ukraynanın Xarkov şəhərində səfirliyimizin nəzdində Azərbaycan Mədəniyyət Mərkəzinin, ART Qalereya və Heykəl Parkının açılışı üçün işlər yekunlaşıb.
YeniAvropa xəbər verir ki, bu barədə Azərbaycanın Ukraynadakı səfirliyindən məlumat verilib. Bildirilib ki, Xarkovun mərkəzində yerləşəcək Azərbaycan Mədəniyyət Mərkəzi, ART Qalereya və Heykəl Parkının açılışı yaz aylarında planlaşdırılır.
Bu layihənin reallaşması səfirliyin dəstəyi və təşəbbüsü ilə Ukraynanın xalq rəssamı, Xarkov Dövlət Dizayn və İncəsənət Akademiyasının heykəltəraşlıq kafedrasının müdiri Seyfəddin Qurbanov tərəfindən həyata keçirilib.
Azərbaycan Mədəniyyət Mərkəzinin və ART Qalereyanın əsas məqsədi Azərbaycan mədəniyyətini və sənətini təbliğ etmək, mədəni irsin qorunması, istedadlı uşaqların inkişafı və dəstəklənməsi, Ukraynanın sosial-iqtisadi vəziyyətinin yaxşılaşdırılması və təkmilləşdirilməsi, humanitar aksiyaların həyata keçirilməsi və xeyriyyə fəaliyyətinin təbliği məqsədilə milli, regional və yerli proqramların həyata keçirilməsinə kömək etməkdir.
Qeyd edək ki, Xarkov əhalisinin sayına görə Ukraynanın ikinci ən böyük şəhəridir.
4935
4935
