Sabah  “Azerbaijan Fashion Week” rəsmi moda həftəsi başlayır

Noyabrın 1-dən 3-dək Bakıda Muzey Mərkəzində “Azerbaijan Fashion Week” (AFV) - ölkəmizin rəsmi moda həftəsinin 8-ci mövsümü işinə başlayacaq. AFV-nin 8-ci mövsümünün rəsmi sloqanı “Art meets fashion” kimi səslənir, mövsümün əsas mövzusunu aydın ifadə edərək, Dəb Həftəsinin təşkilatçıları, həmçinin nümayişlər üçün əsas meydançanın seçimi ilə də, bunu bir daha vurğulamağa qərar veriblər.

“Azerbaijan Fashion Week”in mətbuat xidmətindən YeniAvropa-ya bildirib ki, Azərbaycan Moda Həftəsinin 8-ci mövsümünün əsas vizual obrazları kimi, müəllifin razılığı ilə, Azərbaycanın Əməkdar rəssamı, Azərbaycan Dövlət Rəssamlıq Akademiyasının dosenti, sənətşünaslıq fəlsəfəsi doktoru və Rusiya İmperator Akademiyasının fəxri akademiki Rəşad Mehdiyevin əsərləri istifadə edilib. Qadın - onun siması, cəmiyyətdəki və ilham mənbəyi kimi, yaradıcılıq prosesindəki rolu, qarşıdakı həftənin hörmətli qonaqlarından biri olacaq bu istedadlı müasir rəssamın işlərində mərkəzi yerlərdən birini tutacaq.

8-ci Dəb mövsümün iştirakçıları Kaftan, Aygün Talıbova, Çəkməçi, Meeamee, SK collection, Aya Bapani, Mak Mari, A.Sain, NUBI Couture, La Veine, Noora, Elian Couture, Zherebtsov, Ayşən Həbibova kimi dizaynerlər və markalar olacaqlar. Azərbaycan, Qazaxıstan, Gürcüstan və Tacikistandan olan dizaynerlər 2019-cu ilin yaz-yay mövsümünün ən son kolleksiyalarını qonaqlara təqdim edəcəklər.

“Modaya xas olan yaradıcı başlanğıca baxmayaraq, ilkin olaraq, o, yalnız kommersiya mahiyyətinə əsaslanan istehlak məhsulu kimi qəbul edilirdi, incəsənət isə, daha yüksək estetik sahəyə aid edilirdi. Bu gün isə, ilk növbədə, əl ilə yaradılan və kütləvi istehlak üçün nəzərdə tutulmayan yüksək moda ümumiyyətlə sənətin ayrı bir sahəsi hesab olunur. Muzeylərdə getdikcə daha çox moda sərgilərinin keçirilməsi faktı isə, şübhəsiz, sənət və moda arasında olan sərhədlərin daha da çox silinməsinə səbəb olur”, - deyə AFV-dən bildirilib.

Əsas nümayiş proqramı ilə yanaşı, ənənəvi hala çevrilən “Showroom АFV”də təşkil olunacaq. “Showroom АFV”nin əsas məqsədi - butik sahibləri və bayerlərə uzun-uzadı vasitəçi zəncirindən yan keçərək və axtarışlar üçün vaxt itirmədən dizaynerlərlə bilavasitə ünsiyyətə girmək, mövsümün yenilikləri barədə öyrənmək, yerində və zamanında öz brendini tapmaq, öz qarderobu üçün yeni geyim seçmək imkanı yaratmaqdır.