Türkiyə prezidenti Rəcəb Tayyib Ərdoğan ABŞ-ın Rusiya ərazisinin dərinliklərinə zərbələr endirmək üçün Amerika taktiki raketlərinin istifadəsinə icazə verməsini alqışlamadığını bildirib.
YeniAvropa xəbər verir ki, Türkiyə liderinin Braziliyada keçirilən G20 sammitində onu müşayiət edən jurnalistlərlə söhbətində Ərdoğan Amerika hakimiyyətinin Ukrayna ilə bağlı qərarlarını düzgün hesab etmədiyini qeyd edib.
“Cənab Baydenin bu addımı müharibənin daha da genişlənməsinə və uzanmasına, hətta onun sərhədlərinin başqa ölkələrə yayılmasına kömək edir”, -deyə Türkiyə lideri bildirib.
Onun sözlərinə görə, Rusiya ilə Ukrayna arasında qarşıdurma məsələsində istənilən səhv “barut çəlləyinə atılan kibrit kimidir”. “Ona görə də mən bütün tərəflərə Ukrayna məsələsində ehtiyatlı addımlar atmağı tövsiyə edirəm”, -deyə Türkiyə prezidenti qeyd edib.
Ərdoğan Ukrayna ətrafında eskalasiyanın yeni raundunun “regionu və bütövlükdə dünyanı böyük müharibə astanasına” apara biləcəyi barədə xəbərdarlıq edərək, “məndən sonra, hətta daşqın olsun” düşüncəsinə sadiq olan siyasətçilərdən olmadığını vurğulayıb. O, həmçinin Ukraynada sülhə nail olmaq istiqamətində addımları gücləndirməyə çağırıb.
“Biz Türkiyədə inanırıq ki, Ukrayna və Rusiya arasında müharibə silah tədarükü, qan və göz yaşlarının artması ilə deyil, sülh səyləri, xoşməramlılıq və diplomatik təsir vasitəsi ilə başa çatacaq. Tərəflər sülhə diqqət etməli və sağlam düşüncəni itirməməlidir”, - deyə Ərdoğan sözlərinə əlavə edib.
371
371
