UEFA Çempionlar Liqası: Bu gün 1/8 finalın daha 6 iştirakçısı bəlli olacaq

Bu gün UEFA Çempionlar Liqasının qrup mərhələsində V tura start veriləcək.

YeniAvropa xəbər verir ki, ilk oyun günündə səkkiz qarşılaşma keçiriləcək.

E qrupunda “Latsio” İtaliyada Şotlandiya “Seltik”ini, “Feyenoord” Niderlandda İspaniya “Atletiko”sunu qəbul edəcək. Madrid klubu səfərdə qalib gələcəyi təqdirdə, adını 1/8 finala yazdıracaq. Bu nəticə Roma təmsilçisini də növbəti mərhələyə çıxara bilər. Amma bunun üçün italiyalılar “Seltik”ə qalib gəlməlidirlər.

F qrupunda İtaliya “Milan”ı Almaniyanın “Borussiya” (Dortmund) komandası ilə, Fransa PSJ-si İngiltərə “Nyukasl”ı ilə qarşılaşacaq. Dortmund və Paris təmsilçilərinin mümkün qələbəsi onları pley-off mərhələsinə daşıyacaq.

G qrupunda 1/8 finala vəsiqəni vaxtından əvvəl təmin edən “Mançester Siti” və Almaniyanın “Leyptsiq” komandaları İngiltərədə üz-üzə gələcəklər. Digər matçda isə üçüncü yer uğrunda mübarizə aparan İsveçrə “Yanq Boyz”u ilə Serbiyanın “Srvena Zvezda” komandası münasibətlərinə aydınlıq gətirəcək.

Nəhayət, H qrupunda İspaniya “Barselona”sı ilə Portuqaliya “Portu”su bu tur növbəti mərhələyə adlaya bilərlər. Komandalar öz aralarındakı matçda heç-heçə etsələr, Ukraynanın “Şaxtyor” (Donetsk) klubu isə Belçika “Antverpen”inə məğlub olsa, İspaniya və Portuqaliya təmsilçiləri sona bir tur qalmış istəyinə çata bilərlər. “Barselona” qələbə qazanarsa, digər matçın nəticəsindən asılı olmayaraq 1/8 finala vəsiqə əldə edəcək.

Çempionlar Liqası

Qrup mərhələsi, V tur

28 noyabr

E qrupu

21:45. “Latsio” (İtaliya) – “Seltik” (Şotlandiya)

00:00. “Feyenoord” (Niderland) – “Atletiko” (İspaniya)

Xal durumu: “Atletiko” – 8, “Latsio” – 7, “Feyenoord” – 6, “Seltik” - 1.

F qrupu

00:00. “Milan” (İtaliya) – “Borussiya” (Dortmund, Almaniya)

00:00. PSJ (Fransa) – “Nyukasl” (İngiltərə)

Xal durumu: “Borussiya” – 7, PSJ – 6, “Milan” – 5, “Nyukasl” - 4.

G qrupu

00:00. “Mançester Siti” (İngiltərə) – “Leyptsiq” (Almaniya)

00:00. “Yanq Boyz” (İsveçrə) – “Srvena Zvezda” (Serbiya)

Xal durumu: “Mançester Siti” – 12, “Leyptsiq” – 9, “Srvena Zvezda” – 1, “Yanq Boyz” - 1.

H qrupu

21:45. “Şaxtyor” (Donetsk, Ukrayna) – “Antverpen” (Belçika)

00:00. “Barselona” (İspaniya) – “Portu” (Portuqaliya)

Xal durumu: “Barselona” – 9, “Portu” – 9, “Şaxtyor” – 6, “Antverpen” - 0.