Ərdoğan ölkə konstitusiyasını dəyişir

“Türkiyənin yüzilliyi” konsepsiyası vaxtilə hərbi çevrilişin nəticələrinə əsasən işlənib-hazırlanmış və qəbul edilmiş Konstitusiya əsasında həyata keçirilə bilməz.

YeniAvropa  “Anadolu” agentliyinə istinadla xəbər verir ki, bu barədə prezident Rəcəb Tayyib Ərdoğan  Ankarada hakim Ədalət və İnkişaf Partiyasının 28-ci çağırış parlamentindəki fraksiyasının ilk iclasında çıxış edərkən bildirib.

Onun sözlərinə görə, ölkə Konstitusiyasının yeni redaksiyasının qəbul edilməsi Türkiyənin gələcək inkişafı üçün mühüm stimul olacaq.

Dövlət başçısı ölkənin Əsas qanununun yeni redaksiyasında müsəlman qadınlarının baş örtüyünü taxmaq hüququnu təsbit etməyi təklif edib və hakimiyyətin opponentlərini Türkiyənin yeni Konstitusiyası üzərində aparılan işi dəstəkləməyə çağırıb.

Türkiyə lideri çıxışında, həmçinin vurğulayıb ki, ölkə dünyanın 10 aparıcı iqtisadiyyatı siyahısına daxil olana qədər hökumət səylərini dayandırmayacaq. Bununla bağlı o deyib ki, Nazirlər Kabineti Türkiyənin 12-ci İnkişaf Planı və Ortamüddətli İnkişaf Proqramı üzərində aparılan işi davam etdirir.

“Əminəm ki, ölkəmizin 85 milyonluq əhalisinin hamısı Türkiyənin iqtisadi rifahından bəhrələnəcək. İqtisadi sahədə aparılan işin koordinasiyası üçün biz vitse-prezident, Maliyyə Nazirliyi və Mərkəzi Bank arasında sıx əlaqə qurmuşuq”, - deyə dövlət başçısı əlavə edib.

Prezident qeyd edib ki, ölkədə son 21 ildə real mənada 312 faiz artan minimum əməkhaqqı son onilliklərdə Türkiyənin inkişafının əyani göstəricisidir.