logo

Əbu-Dabidə Qadınların Qlobal Sammiti keçiriləcək

14:34 20-02-2023 | icon 1946
Əbu-Dabidə Qadınların Qlobal Sammiti keçiriləcək

Fevralın 21-də Birləşmiş Ərəb Əmirliklərinin paytaxtı  Əbu-Dabi şəhərində Qadınların Qlobal Sammiti  öz işinə başlayır. 

YeniAvropa xəbər verir ki, iki gün davam edəcək sammit  “Sülhün bərqərar olması, sosial inteqrasiya və rifahın təmin edilməsində qadın liderlərin rolu” mövzusuna həsr olunub.

Qadınlar Birliyinin (GWU) sədri, Analar və Uşaqlar üzrə Ali Şuranın prezidenti, Ailə İnkişafı Fondunun Ali sədri Əlahəzrət Şeyxa Fatimə bint Mübarəkin dəstəyilə Dünya Müsəlman İcmaları Şurası (TWMCC) və BƏƏ-nin Qadınlar Birliyi (GWU) tərəfindən təşkil edilən tədbir qadınların səsvermə hüququ əldə etməsinin 100 illiyinə həsr olunacaq.

Sammitdə gender bərabərsizliyi, məişət zorakılığı və siyasi çatışmazlıqlar kimi məsələlərdə qadın liderliyinin rolu, təcrübələr və çıxış yolları müzakirə ediləcək. Azərbaycan da daxil olmaqla 100-dən çox ölkədən tanınmış dövlət xadimləri, dini liderlər, sahibkarlar, ictimai fəallar, mədəniyyət xadimləri, media nümayəndələri və alimlər iştirak edəcək. Çıxışçılar bəşər tarixinin bu həlledici məqamında qadınların üzləşdiyi çoxsaylı problemlərə toxunacaq və icmalar arasında sülh, inklüzivlik və rifah körpüləri qurmaq yollarını axtaracaqlar.