TƏBİB Beynəlxalq Maliyyə Korporasiyası ilə əməkdaşlıq edəcək

Tibbi Ərazi Bölmələrini İdarəetmə Birliyinin( TƏBİB) icraçı direktoru Vüqar Qurbanov ölkəmizdə səfərdə olan Beynəlxalq Maliyyə Korporasiyasının (BMK) Avropa regionu üzrə direktoru Rana Karadşeh ilə görüşüb.

TƏBİB-dən YeniAvropa-ya bildirilib ki, görüşdə icraçı direktorunun müavinləri Araz Nəsirov və Anar İsrafilov, aidiyyəti struktur bölmələrin rəhbərləri, Beynəlxalq Maliyyə Korporasiyasının Cənubi Qafqaz üzrə regional meneceri və Azərbaycandakı daimi nümayəndəsi iştirak edib.

Görüşün məqsədi TƏBİB və BMK arasında əməkdaşlığın inkişaf perspektivləri ərafında fikir mübadiləsi aparmaq, səhiyyə sektoruna özəl investisiyaların cəlb edilməsi məqsədilə dövlət-özəl sektor tərəfdaşlığı sahəsində məsləhətləşmələr aparmaq olub.

Müzakirələr zamanı diaqnostika, radiologiya və dializ üzrə layihələrin icra olunması, bu istiqamətdə özəl sektora sərmayə yatırımı, dövlət sektoruna isə texniki dəstək göstərilməsi ətrafında təkliflər səsləndirilib. Əsas istiqamət kimi dializ sahəsində dövlət-özəl sektor tərəfdaşlığı üzrə layihənin hazırlanması müzakirə olunub.

TƏBİB-in icraçı direktoru Vüqar Qurbanov Azərbaycan prezidenti İlham Əliyev tərəfindən “Dövlət-özəl tərəfdaşlığı haqqında Azərbaycan Respublikasının Qanunu”nun imzalandığını vurğulayaraq, bu qanunun dövlət xidmətlərinin göstərilməsi, müvafiq infrastrukturun yaradılması və idarəedilməsinə dair dövlət tərəfdaşı ilə özəl tərəfdaşın birgə fəaliyyətini tənzimləyəcəyini bildirib. İcraçı direktor TƏBİB-in də fəaliyyət istiqaməti üzrə bu müstəvidə əməkdaşlığa hazır olduğunu, beynəlxalq və yerli layihələri dəstəklədiyini qeyd edib.

O, Beynəlxalq Maliyyə Korporasiyası ilə laborator, diaqnostik və reabilitasiya xidmətləri sahəsində də əməkdaşlıq istiqamətlərinin nəzərdən keçirilməsini məqsədəuyğun hesab edib.

Beynəlxalq Maliyyə Korporasiyasının Avropa regionu üzrə direktoru Rana Karadşeh Azərbaycanın 1995-ci ildən Korporasiyaya üzv olduğunu, həmin vaxtdan maliyyə, infrastruktur, neft-qaz, ticarət kimi sahələrdə 56 layihəyə 800 milyon dollardan artıq vəsait ayrıldığını qeyd edib. O, səhiyyə sahəsində də özəl sektorun inkişafını təşviq etmək üçün bir sıra məsləhət xidmətləri və maliyyələşmə üzrə əməkdaşlıq edilə biləcəyini vurğulayıb. Rana Karadşeh bildirib ki, TƏBİB universal tibbi xidmətlərin göstərilməsi sahəsində korporasiya üçün etibarlı tərəfdaşdır.

Sonda birgə layihənin texniki detallarının hazırlanması prosesinə başlanılması qərara alınıb.