Bakıda 20-dən çox binanın liftinin naqilini kəsib oğurladı və yaxalandı...
Bakıda çoxmərtəbəli binaların liftlərinin ehtiyat hissələrini oğurlayan şəxslərin saxlanılması istiqamətində polis əməkdaşları əməliyyatları davam etdirirlər.
Daxili İşlər Nazirliyinin mətbuat xidmətindən YeniAvropa-ya bildirilib ki, Binəqədi rayon Polis İdarəsinin cinayət axtarışı şöbəsinin əməkdaşlarının həyata keçirdikləri əməliyyat zamanı əvvəllər məhkum olunmuş paytaxt sakini Soltan Rzayev saxlanılıb.
Onunla bağlı keçirilən əməliyyat nəticəsində həmin şəxsin Binəqədi rayonunda və paytaxtın digər ərazilərində yerləşən 20-dən çox çoxmərtəbəli binanın liftinin naqilini kəsərək oğurladığı məlum olub. S.Rzayev ifadəsində oğurladığı naqilləri paytaxt ərazisindəki müxtəlif metal qəbulu məntəqələrinə satdığını bildirib.
Faktlarla bağlı saxlanılan şəxs barəsində toplanan materiallar rayon polis idarəsinin istintaq şöbəsinə göndərilib. Onun barəsində məhkəmənin qərarı ilə həbs qətimkan tədbiri seçilib. Saxlanılan şəxsin paytaxtın digər rayonlarının ərazisində də oxşar cinayətlər törətməsi istisna edilmir. Onun əməllərindən zərərçəkən başqa vətəndaşlar varsa, ərazi polis orqanlarına, “102” Xidməti-Zəng Mərkəzinə və nazirliyin sosial şəbəkələrdəki rəsmi səhifələrinə məlumat verə bilərlər.
2058
2058
