Saleh Məmmədov çökmüş yolda bir ailənin üç üzvünün ölməsini “əcəl” adlandırdı

Avtomobil Yolları Dövlət Agentliyinin sədri Saleh Məmmədov bir neçə gün əvvəl Bakı-Quba avtomobil yolunun Sumqayıt yaxınlığından keçən hissəsində baş verən və bir ailənin üç üzvünün həlak olması ilə nəticələnən avtomobil qəzasını “əcəl” adlandırıb.

YeniAvropa xəbər verir ki, bu barədə Saleh Məmmədov bu gün keçirdiyi mətbuat konfransında danışıb: “2-3 gün əvvəl Bakı-Quba yolunda baş verən faciə mənim özümə də pis təsir edib. Mətbuat işçiləri gündəlik avtomobil yollarında faciələri hesablayıb nəzərə alsalar, görərlər ki, bu da həmin faciələrdən biridir”.

Xatırladaq ki, qəzada həlak olanlar həmin gün Qusarda qazdan boğulmuş ailənin (ata, ana və üç azyaşlı) yaxınları idi. Həmin qəzanın kadrları yayılıb və məlum olub ki, avtomobil yolda yaranmış qabarmalar nəticəsində idarəetmədən çıxır və körpüdən aşır. Bu da qəzanın əsas səbəbinin yolun yararsız hala düşməsi olduğunu deməyə əsas verir. Hansı ki, belə hallarda yolun istismarına cavabdeh olanlar da məsuliyyət daşımalıdır.

Saleh Məmmədov isə qeyd edib ki, bu yolda sürət həddinin nizamlanması üçün yol işarələri var: “Əcəl Allahın işidir, minimal sürətlə gedəndə də faciə baş verə bilər. Hər birinizdən xahiş edirəm, gedin, həmin yola baxın. O, körpüyə yaxınlaşma yolu olub. 1984-86-cı illərdə ilk dəfə çəkilib və Sumqayıt ərazisindən keçir. 2008-ci ildən yenidən rekonstruksiya olunub. Sumqayıt çayı üzərində sonradan mütəmadi çökmələr olub. Biz bunu nəzərə alaraq tez-tez təmir işləri aparırıq. Orada daralma işarəsi qoyulub və sürət həddi endirilib. Ola bilər ki, sürücü sürət həddinə baxmayıb və faciə baş verib. Amma bu məsələ milli faciə deyil”.

Xatırladaq ki, fevralın 17-də Bakı-Quba avtomobil yolunun Sumqayıtdan keçən hissəsində “Mercedes” markalı avtomobil körpüdən aşıb. Qəza nəticəsində bir ailənin 3 üzvü - sürücü 1988-ci il təvəllüdlü Əliyev Seymur Fikrət oğlu, həyat yoldaşı 1999-cu il təvəllüdlü Ələkbərova Fidan Mövsüm qızı və onların övladları 2021-ci il təvəllüdlü Həmzə hadisə yerində ölüb. DYP-nin rəsmi məlumatına görə, qəza yolun nahamar olmasına görə baş verib.