Polis “Kubinka”da narkotika satan Bibiqulunu yaxaladı

Bakıda narkotik vasitə və psixotrop maddələrin satışı ilə məşğul olan şəxslərin aşkarlanaraq məsuliyyətə cəlb olunmaları istiqamətində əməliyyatlar davam etdirilir.

Daxili İşlər Nazirliyinin mətbuat xidmətindən YeniAvropa-ya bildirilib ki, Nəsimi rayon Polis İdarəsi əməkdaşlarının həyata keçirdikləri əməliyyat-axtarış tədbirləri nəticəsində rayonun “Kubinka”, “Papanin” və digər ərazilərində narkotik vasitələrin və psixotrop maddənin - metamfetaminin qanunsuz dövriyyəsi ilə məşğul olan daha üç nəfər tutulub. Əməliyyat zamanı əvvəllər məhkum olunmuş Abbas Musayev və Mirzə Səfərov saxlanılıblar. Onların üzərindən metamfetamin aşkar edilib. Araşdırma zamanı həmin şəxslərin metamfetamini “Kubinka” adlanan ərazidə narkotik maddələrin satışı ilə məşğul olan Bibiqulu adlı şəxsdən aldıqları müəyyənləşdirilib.

Nəsimi rayon Polis İdarəsinin əməkdaşları Şabran rayon sakini Bibiqulu Əzməmmədovu da yaxalayıblar. Ondan satmaq məqsədilə əldə etdiyi 5 büküm heroin və metamfetamin aşkarlanıb. Bibiqulu Əzməmmədov narkotik vasitələrin satışı ilə məşğul olduğunu etiraf edib.

Xəzər rayon Polis İdarəsinin 2-ci polis şöbəsinin əməkdaşları tərəfindən həyata keçirilən əməliyyat zamanı isə psixotrop maddələrin onlayn yolla satışını həyata keçirən paytaxt sakini Kamran Bağışlı Buzovna qəsəbəsi ərazisində saxlanılıb. Axtarış zamanı ondan 35 qrama yaxın metamfetamin aşkarlanıb. O, ifadəsində psixotrop maddələri şəxsiyyəti istintaqa məlum olmayan xarici ölkə vətəndaşından aldığını və hazır bükümlər şəklində qablaşdıraraq onlayn yolla satışını həyata keçirdiyini bildirib.

Faktlarla bağlı Nəsimi və Xəzər rayon Polis idarələrində Cinayət Məcəlləsinin müvafiq maddələri ilə cinayət işləri başlanıb. Həmin şəxslər tutularaq istintaqa cəlb olunublar. Cinayət işləri üzrə zəruri istintaq-əməliyyat tədbirləri davam etdirilir.