Kulinarlarımızın növbəti uğuru

Milli Kulinariya Mərkəzinin aşpazları Türkiyədə Beynəlxalq Kulinariya Çempionatında böyük uğurlar əldə edib. Mərkəzin 5 komanda üzvünün iştirak etdiyi yarışmada aşpazlarımız 6 qızıl və bir 1 gümüş medal qazanıblar. Kulinarlarımız iştirak etdikləri bütün yarışlarda yüksək nəticə əldə etməyi bacarıblar.

YeniAvropa xəbər verir  ki,  bu fikirlər mayın 4-də milli aşpazlarımızın Afyon və İzmir şəhərlərində keçirilən müsabiqədə qazandıqları uğurlara həsr edilmiş mətbuat konfransında səslənib.

Azərbaycan Milli Kulinariya Mərkəzinin ( MKM) prezidenti Tahir Əmiraslanov yarış barədə ətraflı məlumat verərək bildirdi ki, müsabiqədə ölkəmizi 5 nəfərdən ibarət milli komanda təmsil edib. Yarışa 44 ölkəni təmsil edən aşpazlar qatılıb.

Beynəlxalq münsiflər heyətinə rəhbərlik edən Tahir Əmiraslanov deyib ki, aşpazları Türkiyə, Almaniya, Belçika, İtaliya, Rumıniya, Yunanıstan və Braziliyadan olan peşəkarlar qiymətləndirib.

Kulinariya Çempionatı çərçivəsində eyni zamanda, müxtəlif qida və əl işlərindən ibarət sərgi də açılıb.

Bildirilib ki, təmsilçilərimizdən Araz Əhmədov, Sərxan Məmmədov və Azər Qədirov müxtəlif nominasiyalarda ən yüksək bal toplayaraq ilin aşpazı adına layiq görülüblər.

Gələcəkdə bu cür yarışların davamı olacağını bildirən Kulinariya Mərkəzinin rəhbəri İzmir şəhərində müəllim və tələbələrə ustad dərsi keçdiyini və onlara Azərbaycan mətbəxi barədə geniş məlumat verdiyini bildirib.

Vurğulanıb ki, Türkiyədə təşkil olunan Beynəlxalq Kulinariya Çempionatı bu ilin sonunda keçiriləcək II Dünya Halal İslam Mətbəxi yarışlarına hazırlıq məqsədi daşıyıb.

Sonda jurnalistləri maraqlandıran suallar cavablandırılıb.