logo

Allahşükür Paşazadə beynəlxalq konfransın iştirakçıları ilə görüşüb

22:12 16-03-2023 | icon 1015
Allahşükür Paşazadə beynəlxalq konfransın iştirakçıları ilə görüşüb

Martın 16-da Qafqaz Müsəlmanları İdarəsinin (QMİ) sədri şeyxülislam Allahşükür Paşazadə Bakı Beynəlxalq Multikulturalizm Mərkəzinin (BBMM), Beynəlxalq Münasibətlərin Təhlili Mərkəzinin və G20 Dinlərarası Dialoq Forumunun birgə təşkilatçılığı ilə baş tutan “İslamofobiya irqçiliyin və ayrı-seçkiliyin spesifik forması kimi: Yeni qlobal və transmilli çağırışlar” mövzusunda beynəlxalq konfransın iştirakçıları ilə görüşüb.

YeniAvropa xəbər verir ki, görüşdə çıxış edən Allahşükür Paşazadə əvvəlcə Türkiyədə dağıdıcı zəlzələ nəticəsində çoxlu sayda insanın vəfatı ilə əlaqədar başsağlığı verib. Qeyd edib ki, İslamofobiya ilə Beynəlxalq Mübarizə Gününə həsr olunmuş Bakı Konfransı ölkəmizin ev sahibliyi etdiyi çoxsaylı qlobal əhəmiyyətli tədbirlər sırasında xüsusi yer tutur. “Həqiqətən, dünyanın bu gün üzləşdiyi problem və böhranlardan bəşər ailəsinin çıxış yollarını müzakirə edib müdrik təşəbbüslərlə çıxış etmək, müasir dövrdə təhlükəsizlik və sabitliyə təhdidlərdən biri olan islamofobiyanın qarşısının alınması işinə öz töhfəmizi vermək olduqca vacib, Uca Yaradanımıza xoş gedən əməldir”, - deyə şeyxülislam bildirib.

O vurğulayıb ki, Azərbaycanın belə nüfuzlu tədbirlərə ev sahibliyi etməsi dünyadakı problemlərin mənəvi cəhətdən dəyərləndirilməsi, onların həllinə yardımçı olmaq ənənəsinə sadiqliyimizin təzahürüdür.

QMİ sədri diqqətə çatdırıb ki, Azərbaycan xalqı və dövləti dünyaya bəşərin xilas modeli olaraq multikulturalizm, etnik, dini tolerantlıq modelini təqdim edir, İslam həmrəyliyi ideyalarını dünya miqyasında təşviq edir. Ölkəmizdə Uca Allahın buyurduqlarına uyğun yaşam tərzinin bu modelinin təməli Ümummilli Liderimiz Heydər Əliyevin müdrik zəkasının məhsulu olan Azərbaycançılıq məfkurəsi ilə qoyulub və bu gün Prezident İlham Əliyevin qlobal səyləri sayəsində inkişaf edir, dünyaya təqdim olunur.

Bakı Beynəlxalq Multikulturalizm Mərkəzinin icraçı direktoru Rəvan Həsənov çıxış edərək bildirib ki, Azərbaycanda dəfələrlə humanitar məsələlərlə bağlı konfranslar keçirilib. Qeyd edib ki, ölkəmizdə belə bir konfransın keçirilməsi vacib idi. Elm adamları, din xadimləri və digər insanlar ayrı-seçkiliyə qarşı birgə mübarizə aparmalıdır.

Sonra çıxış edənlər - Milli Məclis sədrinin müavini Fəzail İbrahimli və Türk İslam Birliyinin rəhbəri Sərdar Çələbi ölkəmizin multikultural dəyərlərə sahib olduğunu qeyd ediblər. Bildirilib ki, Avropada islamofobiyanın qarşısının alına bilməməsi ciddi problem yaradır. Buna görə də problemin həlli üçün ciddi şəkildə müzakirələr aparılmalıdır. Bunun üçün birgə olub müzakirə aparmaq vacibdir.

Görüş qonaqların şərəfinə təşkil olunmuş ziyafətlə davam edib.