Qabonda dövlət çevrilişi olub

Qabonda dövlət çevrilişi olub.

YeniAvropa "Anadolu" agentliyinə istinadla xəbər verir ki, milli radionu ələ keçirən bir qrup əsgər ölkədə dövlət çevrilişinin baş verdiyini elan edib.

Xatırladaq ki, Qabon Afrika qitəsinin neftlə zəngin ölkələrindən biridir. 

31 dekabrda prezident Əli Bonqonun xalqa bayram təbriki ölkədə narazılıq  yaradıb. Bunun ardından bu gün səhər saat 04 radələrində hərbçilər  dövlət radiostansiyasını ələ keçiriblər. Leytenant Ondo Obianq Kelli hərbçilər adından bəyənnamə oxuyub.  Ölkədə "Bərpa milli şurası" yaradıldığı elan olunub.  Müraciətdə  prezident Əli Bonqonun xalqa yeni il təbriki kəskin tənqid olunub və ailə hakimiyyətinin saxlanmasına xidmət etdiyi bildirilib. "Artıq zaman yetişib, ordu xalqın tərəfinə keçərək Qabonu xaosdan xilac etməyə qərar verib... Artıq oyanmaq vaxtıdır.. Ətrafınıza nəzər yetirin, qonşularınızı da oyadın, birləşmək vaxtıdır, küçələri nəzarətə götürün",-deyə müraciətdə bildirilib. 

Qeyd edək ki, 59 yaşlı Əli ben Bonqo Ondumbu 2009-cu ildən ölkədə prezidentlik edir. 2016-cı ildə ikinci dəfə prezident seçilsə də , müxaliət seçkilərin saxtalaşdığını bəyan edib. 

Bundan əvvəl isə 42 il müddətində Əli Bonqonun atası Ömər Bonqo Qonqoda prezidentlik edib. O, öldükdən sonra oğlu Əli hakimiyyətə gəlib. Ötən il oktyabrın 24-də Əli Bonqo insult keçirdiyindən Səudiyyə Ərəbistanında uzun müddət müalicə alıb. Hazırda o, Mərakeşdə müalicəsini davam etdirir.

Yeni il münasibətilə xalqa təbrikində Əli Bonqo özünü yaxşı hiss etdiyin və tezliklə ölkəyə qayıdacağını bildirib. Ölkə KİV-i isə belə iddia edir ki, prezidentin sağlıq durumu yerində deyil və bu səbəbdən də ekranda onu tam ölçüdə göstərməyiblər.
Prezidentin ölkədə olmaması səbəbindən Qabonun Konstitusiya məhkəməsi ölkə konstitusiyasına bəzi dəyişiklik edib. Şlkə üçün vacib əhəmiyyətli qərarların qəbil edilməsinə dair prezidentin səlahiyyətində olan bəzi məsələləri baş nazirə həvalə edib.