logo

Təhsil sahəsində Azərbaycan-Gürcüstan  əməkdaşlığı müzakirə edilib

12:25 25-10-2022 | icon 10766
Təhsil sahəsində Azərbaycan-Gürcüstan  əməkdaşlığı müzakirə edilib

Gürcüstanın təhsil və elm naziri Mixail Çxenkeli Azərbaycana səfəri çərçivəsində bir sıra görüşlər keçirib.

 YeniAvropa xəbər verir ki, bu barədə Elm və Təhsil Nazirliyindən məlumat verilib. Bildirilib ki, səfər çərçivəsində Mixail Çxenkeli Fəxri xiyabanı və Şəhidlər xiyabanını ziyarət edib, Azərbaycanın müstəqilliyi və ərazi bütövlüyü uğrunda mübarizədə şəhid olanların xatirəsi anılıb, məzarları üzərinə qərənfillər düzüb.

Daha sonra nazir Bakı Avropa Liseyini ziyarət edib, müəssisədə yaradılan şəraitlə tanış olub, liseyin rəhbərliyi ilə görüşərək iki ölkənin ümumi təhsil müəssisələri arasında əməkdaşlığın perspektivlərini müzakirə edib.

Mixail Çxenkeli, həmçinin Bakı Dövlət Universitetini (BDU) ziyarət edərək rektor Elçin Babayevlə görüşüb. Görüş zamanı BDU-nun Gürcüstanın ali təhsil müəssisələri ilə sıx əməkdaşlıq əlaqələrinin mövcudluğu vurğulanıb və daha da genişləndirilməsinə dair təkliflər səsləndirilib.

Ziyarət çərçivəsində nazir BDU-da gürcü dilini öyrənən tələbələrlə görüşərək onların suallarını cavablandırıb və tələbələrin gürcü dili üzrə bilik səviyyəsindən məmnunluğunu ifadə edib.

Gürcüstanın təhsil və elm naziri Mixail Çxenkeli Azərbaycanın elm və təhsil naziri Emin Əmrullayevlə də görüşüb. Görüş zamanı təhsil sahəsində müxtəlif istiqamətlər üzrə əməkdaşlığın cari vəziyyəti və perspektivləri müzakirə olunub. Gürcüstanda yerləşən tədris Azərbaycan dilində aparılan məktəblər və ölkəmizdə tədris gürcü dilində aparılan məktəblər üçün hər il həyata keçirilən dərsliklərin mübadiləsi yüksək qiymətləndirilib.

Tərəflər müvafiq olaraq gürcü və Azərbaycan dillərində tədrisin təkmilləşdirilməsi, pedaqoji heyət üçün ixtisasartırma təlimlərinin təşkili, habelə iki ölkənin ali təhsil müəssisələri arasında birbaşa əlaqələrin genişləndirilməsi ətrafında fikir mübadiləsi aparıblar.