Sloveniyalı Aleksandr Çeferin bu gün yenidən UEFA prezidenti seçiləcək

11:52 07-02-2019 | 3479

Bu gün İtaliyanın paytaxtı Romada UEFA-nın 43-cü Konqresi keçiriləcək.

YeniAvropa xarici KİV-ə istinadən xəbər verir ki, toplantıda Avropa futbol qurumunun növbəti 4 il müddətinə prezidenti seçiləcək.

Səsvermə alternativsiz olacaq. Təşkilatın hazırkı rəhbəri 52 yaşlı sloveniyalı Aleksandr Çeferin bu posta vahid namizəddir. Onun namizədliyini UEFA-ya üzv olan bütün 55 milli asssosiasiya, o cümlədən, AFFA tərəfindən də dəstəklənib. Bu səbəbdən, seçki formal əhəmiyyət kəsb edir.

Bakı vaxtı ilə saat 12:30-da başlanacaq Konqresdə UEFA İcraiyyə Komitəsinə 8 üzv də seçiləcək.

Xatırladaq ki, ixtisasca hüquqşünas olan Aleksandr Çeferinin futzala olan həvəsi 2005-ci ildə onu yerli komandanın İdarə Heyətinə üzvlüyünə gətirib. 2011-ci ildə isə o, Sloveniya Futbol Federasiyası prezidenti seçilib. 14 sentyabr 2016-cı ildə Yunanıstanın paytaxtı Afinada keçirilən Konqres çərçivəsində baş tutan seçkilərdə Sloveniya Futbol Federasiyasının prezidenti Aleksander Çeferin rəqibi Niderland Krallığı Futbol Federasiyasının rəhbəri Mixael van Praqa qalib gələrək UEFA-nın 7-ci prezidenti seçilib. O, 55 mümkün səsdən 45-ni toplaya bilib.