Avropa çempionatı: Azərbaycan ilk 8-də yer almadı

Bakı İdman Sarayında 17 yasadək həndbolçu qızların Avropa çempionatına yekun vurulub. Yarışın son günündə həlledici oyunlar keçirilib.

YeniAvropa xəbər verir ki, bu barədə Azərbaycan Həndbol Federasiyasından məlumat verilib. Bildirilib ki, sonuncu gün 7-8-ci yerlər uğrunda oyunda Gürcüstan millisi ilə görüşən Yunanıstan həndbolçuları 29:17 hesabı ilə qələbə qazanıblar. Bosniya və Herseqovina seçməsi isə 5-6-cı yerlər uğrunda oyunda İsrail millisinə çətinliklə qalib gəlib - 32:31.

Litva - Farer adaları matçında 32:27 hesablı qələbə çalan litvalılar çempionatı 3-cü pillədə başa vurublar.

Yarışın qalibi İspaniya - Sloveniya görüşündə müəyyənləşib. Maraqlı idman mübarizəsi şəraitində keçən oyunda ispaniyalılar daha inamlı təsir bağışlayıblar. Bunun məntiqi nəticəsi kimi 28:20 hesabı ilə qalib gələn İspaniya millisi Avropa çempionu adına layiq görülüb.

Final matçından sonra mükafatlandırma mərasimi keçirilib.

Mərasimdə Avropa Həndbol Federasiyasının nümayəndəsi Ştefan Lövqren çıxış edərək Bakıda keçirilən qitə çempionatının yüksək səviyyədə təşkil olunduğunu diqqətə çatdırıb. Təşkilatçılığa görə Azərbaycan Həndbol Federasiyasının fəaliyyətini yüksək qiymətləndirən Ştefan Lövqren İspaniyanı çempion olması münasibətilə təbrik edib. O, digər komandalara da göstərdiyi oyuna görə təşəkkür edib.

Çempionatın ən yaxşı oyunçularına, həmçinin yarışın hakimlərinə və Avropa Həndbol Federasiyasının nümayəndələrinə, yüksək səviyyədə təşkilatçılığa görə Azərbaycan Həndbol Federasiyasının nümayəndələrinə hədiyyələr verildikdən sonra qalib komandaların üzvlərinə medallar təqdim olunub.

Nəticələrə əsasən İspaniya komandası qızıl, Sloveniya kollektivi gümüş, Litva həndbolçuları isə bürünc medallara layiq görülüb.

Medalları idmançılara Avropa Həndbol Federasiyasının nümayəndəsi Ştefan Lövqren, Azərbaycan Həndbol Federasiyasının vitse-prezidenti Orxan Abbasov və baş katib Yusif Atakişiyev təqdim ediblər.

Bununla da 17 yaşadək həndbolçu qızların Avropa çempionatına yekun vurulub.