Bakı şəhəri ilə Çinin Sıçuan əyaləti arasında memorandum imzalanıb

Bakı şəhər İcra Hakimiyyətinin (BŞİH) başçısı Eldar Əzizovun rəhbərlik etdiyi nümayəndə heyəti Çin Xalq Respublikasının Sıçuan əyaləti rəhbərliyinin dəvəti ilə əyalətdə işgüzar səfərdə olub.

BŞİH-in mətbuat xidmətindən YeniAvropa-ya bildirilib ki, səfər çərçivəsində Sıçuan əyalətinin qubernatoru Huan Çian ilə keçirilən görüşdə Azərbaycan-Çin münasibətlərinin belə yüksək səviyyədə olmasının, eyni zamanda, inkişaf etməsinin Azərbaycan prezidenti İlham Əliyevin və Çin lideri Si Cinpinin böyük səylərinin nəticəsi olduğu diqqətə çatdırılıb. Huan Çian deyib ki, Azərbaycan Prezidentinin həyata keçirdiyi effektiv siyasət və uğurlu islahatlar sayəsində Azərbaycan və paytaxt Bakı şəhəri yüksək inkişaf tempi nümayiş etdirir, dünyada özünəməxsus yer tutur. Azərbaycandakı inkişafı və sabitliyi vurğulayan qubernator ölkəmizin öz torpaqlarını işğaldan azad etdiyini xüsusi vurğulayıb.

Söhbət zamanı qubernator Huan Çian tərəfindən Çin Xalq Respublikası vətəndaşlarının Bakı şəhərinə və Azərbaycana olan marağını nəzərə alınaraq, Çendu–Bakı aviareysinin açılması təklifi irəli sürülüb.

Bakı şəhər İcra Hakimiyyətinin başçısı Eldar Əzizov Sıçuan əyalətinin qazandığı uğurları qeyd edərək bildirib ki, son illərdə Azərbaycan prezidenti İlham Əliyevin uğurlu sosial-iqtisadi siyasəti nəticəsində Bakı şəhəri də yeni görkəm alıb və sürətlə inkişaf edir.

Görüşdən sonra “Azərbaycan Respublikasının paytaxtı Bakı şəhəri ilə Çin Xalq Respublikası Sıçuan əyaləti arasında dostluq və tərəfdaşlıq münasibətlərinin qurulması barədə anlaşma Memorandumu” imzalanıb.

Daha sonra Bakı şəhərinin nümayəndələri Çin Xalq Respublikasının paytaxtı Pekinə gələrək şəhər merinin müavini xanım Sima Honla görüşüblər. Merin müavini xüsusi vurğulayıb ki, bu gün Azərbaycanda sabitlik hökm sürür, prezident İlham Əliyevin siyasəti nəticəsində Azərbaycan postsovet məkanında ən inkişaf etmiş ölkələrdəndir. Bu gün Azərbaycan və paytaxt Bakı şəhəri sürətlə inkişaf edir, ona görə də çinli sahibkarların Azərbaycana böyük marağı var.

Görüş zamanı paytaxt şəhərlər arasında əməkdaşlığa dair planlar müzakirə edilib.

Səfərin nəticəsinə əsasən Pekin meriyasının nümayəndə heyətinin Bakıya rəsmi səfərə gələrək iki paytaxt arasında əməkdaşlığa dair memorandumun imzalanması barədə razılıq əldə edilib.