Vəkillər Vilyam Hacıyevin məhkəməsini qəsdən pozur-İDDİA

11:44 14-02-2022 | 1932

Bakı Ağır Cinayətlər Məhkəməsində İmişlinin keçmiş icra başçısı Vilyam Hacıyevin cinayət işi üzrə bu gün keçiriləcək məhkəmə prosesi təxirə salınıb.

YeniAvropa xəbər verir ki, buna səbəb sabiq icra başçısının müdafiəçilərinin məhkəmədə iştirak etməmələri olub.

V.Hacıyev müdafiəçilərinin, xüsusilə də vəkil Elmar Kərimovun iştirakı olmadan məhkəmə iclasının keçirilməsinə etiraz edib.

Hakim müdafiə tərəfi olmadan məhkəmə iclasının onsuz da keçirilməyəcəyini keçmiş icra başçısının diqqətinə çatdırıb. Lakin V.Hacıyevin müdafiəçilərin məhkəmə iclasını qəsdən pozmağa çalışdıqlarını da bildirib: " Üç vəkildən biri gəlmirsə niyə müqavilə bağlayırlar? Bu vəkillərlə bağlı tədbir görüləcək və Vəkillər Kollegiyasının sədrinə müraciət olunacaq".

Hakimin qərarı ilə məhkəmə prosesi fevralın 18 -nə kimi təxirə salınıb.

Xatırladaq ki, 2020-ci il mayın 5-də məhkəmənin qərarı əsasında Dövlət Təhlükəsizliyi Xidməti tərəfindən V.Hacıyevin xidməti və yaşadığı ünvanlarda əməliyyat-istintaq tədbirləri həyata keçirilib. Daha sonra o, həbs edilib.

İstintaq orqanı tərəfindən V.Hacıyevin barəsində Cinayət Məcəlləsinin 179.3.2-ci (külli miqdarda mənimsəmə və ya isriaf etmə, 308.1-ci (vəzifə səlahiyyətlərindən sui-istifadə, yəni vəzifəli şəxsin xidməti vəzifələrinin icrası ilə əlaqədar özü və ya üçüncü şəxslər üçün qanunsuz üstünlük əldə etmək məqsədilə öz qulluq səlahiyyətlərindən qulluq mənafeyinə qəsdən zidd olaraq istifadə etməsi və ya qulluq mənafeyi tələb etdiyi halda istifadə etməməsi fiziki və ya hüquqi şəxslərin hüquqlarına və qanuni mənafelərinə, yaxud cəmiyyətin və ya dövlətin qanunla qorunan mənafelərinə mühüm zərər vurduqda), 311.3.3-cü (rüşvət alma (passiv rüşvətxorluq), külli miqdarda törədildikdə) və 313-cü (vəzifə saxtakarlığı) maddələri ilə ittiham elan olunub.