Bakıda Xüsusi qayğıya ehtiyacı olan insanlar üçün 4-cü Konqres keçiriləcək

Martın 5-də Əmək və Əhalinin Sosial Müdafiəsi Nazirliyi, Heydər Əliyev Fondu, Heydər Əliyev Mərkəzi, İcbari Tibbi Sığorta üzrə Dövlət Agentliyi, Kiçik və Orta Biznesin İnkişafı Agentliyi, Ailə, Qadın və Uşaq Problemləri üzrə Dövlət Komitəsi, Regional İnkişaf İctimai Birliyi, Dayanıqlı Operativ Sosial Təminat Agentliyi və Sosial Xidmətlər Agentliyinin dəstəyi ilə 4-cü “Fərqli Fərdlər” konqresi keçiriləcək.

YeniAvropa xəbər verir ki, bu barədə “Caspian Event Organisers” şirkətindən bildirilib.

Qeyd edilib ki,  “Fərqli Fərdlər” konqresinin qızıl sponsoru "BP" şirkətidir. Gümüş sponsor qismində isə “PMD Group” şirkəti çıxış edir. Tədbir həmçinin “Logos” Psixoloji və Nitq İnkişaf Mərkəzi, “CTS Translation”, “Black & Black Studio”, “Konfrans Services” və “AzExpoMontage” şirkətləri tərəfindən dəstəklənir. Konqresin təşkilatçıları “Caspian Event Organisers” (ceo.az) şirkəti və “Edutainment.az” təhsil strukturudur.

Spiker qismində tanınmış yerli və aparıcı beynəlxalq ekspertlər, ABŞ, Azərbaycan, İsrail, Latviya, Rusiya, Türkiyə, Ukrayna, Yunanıstan və başqa ölkələrdən olan pedaqoq və metodistlər, həkimlər, psixoloq və psixoterapevtlər iştirak edəcəklər. “Fərqli Fərdlər” konqresinin prodüseri “Autistic city” ASP diaqnozlu insanlara dəstək mərkəzinin rəhbəri Antonina Steynberqdir.

Konqresin builki proqramına 5 sessiya daxildir: xüsusi insanların həyatının xüsusiyyətləri; inkişaf xüsusiyyətləri - rifah amili kimi ailə dəstəyi; xüsusi ehtiyaclar nəzərə alınmaqla səhiyyə xidmətinin əlçatanlığı və keyfiyyəti; xüsusi qayğıya ehtiyacı olan insanlar üçün təhsil və karyera; xüsusi qayğıya ehtiyacı olan insanlar üçün qabaqcıl texnologiyalar.

Tədbirdə xüsusi qayğıya ehtiyacı olan insanların təhsil proqramları, könüllülük və təcrübə proqramları, istedadların aşkarlanması proqramları, inklüziv işə qəbul, perspektivlər və digər mövzular müzakirə olunacaq.

İlk dəfə olaraq konqresdə “Uşaq serebral iflici (USİ): miflərin dağılması” mövzusuna toxunulacaq.