Cavanşir Feyziyev Mətbuat Şurasının idarə heyətindən çıxarılır?

Media nümayəndələrini təhqir edən, onlara “reket”, “dələduz”, “casus” deyən biznesmen-deputat Cavanşir Feyziyev Mətbuat Şurasının İdarə Heyətindən çıxarılacağı gözlənilir. 

 YeniAvropa xəbər verir ki, bu barədə Mətbuat Şurasının sədri Əflatun Amaşov məsələ ilə bağlı  "musavat.com"a açıqlamasında bildirib. Onun sözlərinə görə, bu məsələ tez bir zamanda Mətbuat Şurasının gündəliyinə çıxarılacaq.

Əflatun Amaşov hazırda koronavirusa yoluxduğunu və bu məsələni imkan daxilində izlədiyini də deyib.

Ə.Amaşov bildirib ki, Cavanşir Feyziyev Mətbuat Şurasının idarə heyətində qala bilməz.

Yaxın saatlarda Əflatun Amaşovun rəsmi açıqlaması gözlənilir.

Qeyd edək ki,  Böyük Britaniyada  korrupsiyada ittiham olunan deputat Cavanşir Feyziyev bir qrup azərbaycanlı jurnalisti - Rauf Arifoğlu, Eynulla Fətullayev, Xalid Kazımlı, Əvəz Zeynallı, Xədicə İsmayılova, Zaur Qəriboğlu, Elnur Məhərrəmli, Osman Gündüz, Sevinc Telman qızı və Azərbaycan vətəndaş cəmiyyətinin bir çox hörmətli nümayəndələrini təhqir edib. Deputat Böyük Britaniyada səs-küylü məhkəmə prosesini işıqlandıran jurnalistləri “reketçilər” və “Qərbin agentləri” adlandırıb.

Xatırladaq ki, Britaniyanın maliyyə müstəntiqləri deputat Cavanşir Feyziyevin ailə üzvlərinə məxsus Böyük Britaniyadakı bank hesablarında olan 5,6 milyon funt sterlinqin müsadirə edilməsi üçün order əldə ediblər. Bu barədə Britaniyayın Milli Cinayət Agentliyi məlumat yayıb. 

Geniş araşdırmadan sonra onun həyat yoldaşı Pərvanə Feyziyeva, oğlu Orxan və qardaşı oğlu Elmanın hesablarının dondurulması ilə bağlı 6 göstəriş verilib.

Nəticədə bank hesablarından ilkin olaraq dondurulmuş 15,3 milyon funt sterlinqdən təxminən 5,6 milyon funt sterlinq (7 milyon dollardan çox) müsadirə edilib.