Xəzər rayonunun Binə qəsəbəsində yeni tikilməkdə olan evlərdən birindən oğurluq edilib.
Daxili İşlər Nazirliyinin mətbuat xidmətindən YeniAvropa-ya verilən məlumata görə, zərərçəkən şəxs rayon polis idarəsinin 3-cü polis şöbəsinə müraciət edərək evdən təmir-tikinti əşyaları, eləcə də elektrik naqillərinin oğurlandığını bildirib.
Şöbə əməkdaşlarının həyata keçirdikləri təxirəsalınmaz əməliyyat-axtarış tədbiri nəticəsində hadisəni törətməkdə şübhəli bilinən Binə qəsəbəsində yaşayan Əliqismət Əzizov qısa zamanda saxlanılıb.
Polis şöbəsində araşdırma aparılan zaman onun Binə qəsəbəsində əlavə olaraq altı evdən və bir mebel sexindən oğurluq etdiyi müəyyənləşdirilib. Əliqismət Əzizov izahatında etdiyi oğurluqları etiraf edib.
Faktlarla bağlı 3-cü polis şöbəsində toplanan materiallar Xəzər rayon Polis İdarəsinin istintaq şöbəsinə göndərilib. Əliqismət Əzizovun paytaxt ərazisində digər oxşar cinayətlər törətdiyi istisna olunmur. Onun qanunsuz əməllərindən zərərçəkən başqa vətəndaşlar varsa, bu barədə ərazi polis orqanlarına və ya rayon polis idarəsinin 3-cü polis şöbəsinə məlumat verə bilərlər.
1869
1869
