SOCAR Rumıniyada 67-ci yanacaqdoldurma məntəqəsini açdı 

SOCAR-ın Rumıniyada daha bir yanacaqdoldurma məntəqəsi (YDM) fəaliyyətə başlayıb.

YeniAvropa xəbər verir ki, “SOCAR” brendli yeni yanacaqdoldurma məntəqəsi xarici turistlərin və yerli sakinlərin daha çox səfər etdiyi, ölkənin əsas turizm mərkəzlərindən biri olan Sibiu regionunun eyni adlı şəhərində yerləşir. Sibiu Beynəlxalq hava limanı yaxınlığında yerləşən sözügedən məntəqə bu regionda müştərilərin ixtiyarına verilən sayca 4-cü, ümumilikdə isə Rumıniya ərazisində açılmış 67-ci “SOCAR” brendli YDM-dir.

Yeni məntəqədə quraşdırılmış 3 sayğac, 4 kiçik və 2 böyük avtonəqliyyat vasitələrinin eyni anda yanacaqla təmin olunmasına imkan verir. Burada “NANO 95” və “NANO 98” (benzin), “NANO Dizel” və “NANO Super Dizel” tipli yanacaq məhsullarının satışı həyata keçirilir. Bundan başqa, məntəqə maye qaz (LPG) yanacağı ilə də təchiz edilib. Məntəqədə avtoyuma və elektromobillər üçün şarj aparatı da quraşdırılıb, avtomobillərin salonlarının təmizlənməsi üçün tozsoran aparatı da qoyulub. Ənənəyə uyğun olaraq SOCAR müştəriləri və qonaqlar məntəqədə təkərlərin doldurulması, pulsuz internet, telefonların enerji ilə doldurulması kimi pulsuz xidmətlərdən də istifadə edə bilərlər.

Məntəqə ərazisindəki "Nar" kafedə yerli və Azərbaycandan gətirilmiş məhsulların satışı da həyata keçirilməkdədir. SOCAR-ın Rumıniya üzrə bütün YDM-lərində “Azərbaycan guşəsi” yaradılmış, məntəqələrdə quraşdırılan monitorlarda mütəmadi olaraq Azərbaycanın təbliği istiqamətində videoçarxlar da nümayiş etdirilir.

Hazırda Rumıniyanın 26 regionunda 67 “SOCAR” brendli yanacaqdoldurma məntəqəsinə malik şirkət təsdiq etdiyi strateji inkişaf planına uyğun olaraq növbəti ildə də yanacaqdoldurma məntəqələri şəbəkəsini genişləndirməkdə davam edəcək.

Qeyd edək ki, SOCAR Rumıniyadakı fəaliyyətini 2011-ci ildə yaradılmış “SOCAR Petroleum SA” şirkəti vasitəsi ilə həyata keçirir.