Bakının Səbail rayonunda yerləşən 189-190 saylı orta məktəbin direktoru, müəllimlərə “məktəbin xərclərini ödəmək üçün” pul yığmaq tapşırığı verdiyi barədə səs yazısı internetdə yayılan, bu qalmaqala görə işdən çıxarılan Ceyran Kuliyeva baş nazirin keçmiş müavini Abid Şərifovun bacısı qızıdır.
YeniAvropa xəbər verir ki, bu barədə yerli KİV-lərə açıqlama verən Abid Şərifov faktı təsdiqləyib, hələ üstəlik bacısı qızının “başına daş düşməsini” də arzulayıb.
“Belə hallar təbii ki, pisdir. Heç kəs rüşvət almamalıdır, təmiz işləməlidir. Mənim bacım qızının başına daş düşsün, səhv edib, işdən çıxarıblar. Kim səhv edirsə, işdə nöqsanlara yol verirsə, onu vəzifəsindən azad etmək lazımdır”, - Abid Şərifov belə deyib.
Qeyd edək ki, Abid Şərifov özü də baş nazirin müavini kimi “çox təmiz işləyirdi” və onun özünün, ailə üzvlərinin çoxsaylı biznes aktivləri, mülkləri barədə mətbuatda çoxsaylı faktlara rast gəlmək olar. Məsələn, uzun illər ərzində büdcə vəsaitləri hesabına iri infrastruktur və tikinti layihələrini icra edən “Evrascon” tikinti şirkətinin Abid Şərifovun ailə biznesinə aid olduğu çoxdan məlumdur. O cümlədən onun ailə üzvlərinin Avropada da çoxsaylı aktivləri var. Məsələn, Abid Şərifovun 29 yaşlı nəvəsi Nicat Mahmudovun Londonda biznesi, Şəkidə bu yaxınlarda istifadəyə verilmiş otel-istirahət kompleksi və digər aktivləri mövcuddur.
1624
1624
