5 il əvvəl Rusiyada qətl törədən azərbaycanlı həbs edilib

Rusiya vətəndaşı Bessonov Aleksandr Vitalyeviçin 2016-cı il aprelin 3-də Lipetsk vilayətinin Lebedyan şəhərində öldürülməsi ilə bağlı Rusiya Federasiyasının İstintaq Komitəsi tərəfindən başlanmış cinayət işi üzrə aparılmış istintaq tədbirləri nəticəsində cinayətin Bakı şəhər sakini İsayev Rəşad Sərdar oğlu tərəfindən törədilməsi müəyyənləşdirilib. Cinayət işi istintaqın davam etdirilməsi üçün ərazi aidiyyəti üzrə Nərimanov rayon Prokurorluğuna göndərilib.

Nərimanov rayon Prokurorluğundan YeniAvropa-ya daxil olan məlumatda bildirilib ki, istintaqla Rəşad İsayevin 2016-cı il aprelin 3-də saat 01:00 radələrində Lipetsk vilayətinin Lebedyan şəhəri Turgenev küçəsi 30 ünvanda yerləşən “Veqas” kafesinin qarşısında tanışları ilə hərəkətsiz vəziyyətdə olan avtomobilin salonunda işlək vəziyyətdə olan maqnitofonda ucadan ifa edilən mahnıların müşayiəti ilə avtomobilin yanında rəqs edərkən həmin vaxt kafeyə müştəri kimi gəlmiş Aleksandr Bessonovun musiqi səsinin yüksək olması ilə əlaqədar onlara iradını bildirməsi səbəbindən aralarında yaranmış mübahisə zamanı üzərində gəzdirdiyi bıçaqla A.Bessonovun sağ ayağına xuliqanlıq niyyəti ilə qəsdən bir dəfə zərbə vuraraq sonuncuya sağlamlığa ağır zərər vurmaya aid xəsarət yetirdiyi, nəticədə A.Bessonovun aparıldığı xəstəxanada öldüyü müəyyən edilib.

Rəşad İsayevin həmin cinayət əməllərini törətməsi tam sübuta yetirildiyindən 2021-ci il dekabrın 6-da ona Cinayət Məcəlləsinin 12.1, 126.3-cü (qəsdən sağlamlığa ağır zərər vurma ehtiyatsızlıqdan zərərçəkmiş şəxsin ölümünə səbəb olduqda) və 228.4-cü (qanunsuz olaraq qaz silahını, soyuq silahı, o cümlədən soyuq atıcı silahı əldə etmə, satma və ya gəzdirmə) maddələri ilə ittiham elan olunub.

Cinayət işi üzrə istintaq yekunlaşdırılaraq baxılması üçün Bakı Ağır Cinayətlər Məhkəməsinə göndərilib.