Bakıda Həştərxan Biznes Mərkəzi açılacaq

Azərbaycanda Həştərxan Biznes Mərkəzinin açılışı bu ilin dekabrına planlaşdırılır.

 YeniAvropa xəbər verir ki, bu barədə Həştərxan vilayəti qubernatoru administrasiyasının Mətbuat və İnformasiya Xidməti İdarəsindən bildirilib.

Qeyd edilib ki, bu barədə razılıq Həştərxan vilayətinin qubernatoru İqor Babuşkinin Bakı şəhəri Nərimanov rayon İcra Hakimiyyətinin başçısı Abdin Fərzəliyev ilə işgüzar görüşündə əldə olunub. 

“Azərbaycan uzun illərdir ki, regionumuzun aparıcı tərəfdaşlarından biridir. Azərbaycan hökuməti, Bakının Nərimanov rayon İcra Hakimiyyəti və Heydər Əliyev Fondu ilə əməkdaşlıq edərək bir çox irimiqyaslı layihələr həyata keçirmişik”, - deyə qubernator qeyd edib.

Pandemiyaya baxmayaraq, bu ilin səkkiz ayının nəticələrinə görə Həştərxan vilayətinin Azərbaycanla xarici ticarət dövriyyəsi 8,5 milyon ABŞ dollarından çox təşkil edib ki, bu da ötən ilin göstəricilərinə yaxındır.

“Şübhəsiz ki, bizim ticarət əməkdaşlığımızın potensialı daha böyükdür və ticarət dövriyyəsinin həcmləri artırıla bilər. Biz ticarət əlaqələrinin genişləndirilməsi perspektivlərini iki biznes mərkəzləri - Həştərxandakı Azərbaycan Biznes Mərkəzinin və Bakıda tezliklə birlikdə açacağımız Həştərxan Biznes Mərkəzinin işi ilə əlaqələndiririk. Mən əminəm ki, bu iki qurumun fəaliyyəti Həştərxan vilayəti ilə Azərbaycan arasında münasibətlərin inkişafına əlavə təkan verəcək”, - deyə İqor Babuşkin əlavə edib.

Qubernator qeyd edib ki, bu əlamətdar hadisə Azərbaycan Respublikasının Prezidenti İlham Əliyevin dəstəyi və görülən işlər sayəsində baş verəcək. Bakıdakı Həştərxan Biznes Mərkəzi azərbaycanlı tərəfdaşlarla işgüzar danışıqların aparılması və Həştərxan istehsalçılarının məhsullarının Azərbaycan bazarına çıxarılması üçün regionun əsas platformasına çevriləcək.

Abdin Fərzəliyev çoxillik əməkdaşlığa görə Həştərxan vilayətinin qubernatoruna təşəkkür edib və bildirib ki, Bakıda tikilmiş biznes mərkəzi hələ ki, Azərbaycan ərazisində Rusiya Federasiyasının yeganə belə nümayəndəliyidir. Bakıda Həştərxan Biznes Mərkəzinin tikintisi layihəsinin həyata keçirilməsi ideyası Həştərxanda Azərbaycan Biznes Mərkəzinin tikintisi zamanı yaranıb. 2017-ci il dekabrın 19-da Bakıda Həştərxan Mərkəzinin gələcək tikintisinin aparılacağı yerdə ənənəvi ilk daşın qoyulması mərasimi olub. Artıq 2018-ci ilin yanvarında mütəxəssislər binanın tikintisinə başlayıblar. Mərkəzin açılışı 2021-ci ilin iyun ayına planlaşdırılmışdı, lakin pandemiyaya görə mərasim qubernatorun başçılıq etdiyi Həştərxan nümayəndə heyətinin Bakıya səfəri baş verəcəyi zaman, dekabr ayına təxirə salınmalı oldu.