DYP Qaradağda 2 nəfərin öldüyü  avtoqəza ilə bağlı məlumat yaydı

Baş Dövlət Yol Polisi İdarəsi (BDYPİ) noyabrın 2-də Qaradağ rayonunda 2 nəfərin ölümü və 1 nəfərin xəsarət alması ilə nəticələnən ağır yol-nəqliyyat hadisəsinə dair məlumat yayıb.

İdarədən YeniAvropa-ya daxil olan məlumatda bildirilib ki, saat 04:30 radələrində Bakı-Qazax-Gürcüstan sərhədi avtomobil yolunun Qaradağ rayonunun Qobustan qəsəbəsi ərazisindən keçən 59,8-ci kilometrliyində 1980-ci il təvəllüdlü Abıyev Seymur Abı oğlu idarə etdiyi “Ford Transit” markalı 90-ZX-246 dövlət qeydiyyat nişanlı yük-sərnişin avtomobili ilə Bakı şəhəri istiqamətində hərəkətdə olarkən eyni istiqamətdə qarşıda hərəkətdə olan 1981-ci il təvəllüdlü Güləliyev Mehman Telman oğlunun idarə etdiyi “Howo” markalı 99-RJ-244 dövlət qeydiyyat nişanlı yük avtomobilinin arxa hissəsinə toxunaraq onunla toqquşub. Qəza nəticəsində “Ford” markalı nəqliyyat vasitəsində olan sərnişinlər - 1963-cü il təvəllüdlü İsmayılova İradə Balaxan qızı, 1975-ci il təvəllüdlü Aşurova Əhliqə Ağasəf qızı ölüb, 1960-cı il təvəllüdlü Məhərrəmova Sulduzə Həsən qızı xəsarət alaraq xəstəxanaya yerləşdirilib. İlkin məlumata əsasən, hadisənin baş verməsinə “Ford” markalı avtomobilin sürücüsünün sükan arxasında yuxulaması səbəb olub.

“Son vaxtlar ölümlə nəticələnən ağır yol-nəqliyyat hadisələri üzrə aparılan araşdırmalar göstərir ki, bir çox qəzalara sürücülərin sükan arxasında yuxulaması səbəb olur. Təəssüf ki, sükan arxasına keçən şəxslər bu məqamlara diqqətsizlik etməklə yalnız özlərinin deyil, digər hərəkət iştirakçılarının da həyatını təhlükəyə atırlar.

Baş Dövlət Yol Polisi İdarəsi belə ağır nəticəli yol-nəqliyyat hadisələrinin yaşanmaması üçün bir daha sürücülərdən iş və istirahət rejiminə düzgün əməl etməyi, yorğun, yuxulu, əzgin halda, dərman preparatlarının təsiri altında sükan arxasına əyləşməməyi xahiş edir. Hər 2-3 saatlıq fasiləsiz hərəkətdən sonra mümkün qədər qısa müddətə də olsa avtomobilinizi saxlayıb istirahət edin. Bunun üçün Dövlət Yol Polisinin respublika əhəmiyyətli yollarda yerləşən stasionar postlarında yaradılan şəraitdən istifadə edə bilərsiniz”, - deyə Baş Dövlət Yol Polisi İdarəsi sürücülərə müraciət edib.