Füzuli rayonunda Vətən müharibəsində düşmənin atıb qaçdığı silah-sursatları aşkarlanıb

14:11 17-10-2021 | 2037

Vətən müharibəsində Zəfər qazanmağımızın bir ili tamam olur. Tariximizə yazılan 44 səhifəlik hünər dastanının hər günü parlaq qələbələrimizlə zəngindir. Vətən müharibəsinin 21-ci günü – oktyabrın 17-də Füzuli rayonu Silahlı Qüvvələrimiz tərəfindən düşmən işğalından azad edilib.

Daxili İşlər Nazirliyinin mətbuat xidmətindən YeniAvropa-ya verilən məlumata görə, ötən müddət ərzində Füzuli rayon Polis Şöbəsinin əməkdaşları rayon ərazisində zəruri olan bütün tədbirləri yerinə yetirib, təhlükəsizliyin təmin edilməsi istiqamətində lazımi işlər görüb.

İşğaldan azad edilən zaman düşmənin atıb qaçdığı silah-sursatların aşkarlanması istiqamətində görülən tədbirlər nəticəsində polis əməkdaşları tərəfindən 38 müxtəlif təyinatlı raket sistemləri, 39 avtomat, 9 pulemyot, 14 qumbaraatan, 118 qumbara, minaatan qurğusu, xeyli sayda müxtəlif çaplı mərmi və minlərlə güllə aşkar edilərək aidiyyəti üzrə təhvil verilib.

Bundan başqa, keçirilmiş kompleks tədbirlər nəticəsində işğaldan azad edilmiş Qacar kəndi ərazisində yabanı halda bitmiş çəkisi 217 kiloqram olan 1263 çətənə bitkiləri yığılaraq məhv edilib.