logo

“Lukoil” 2,25 milyard dollara “Şahdəniz”dən 15,5% pay aldı

10:30 08-10-2021 | icon 3325
“Lukoil” 2,25 milyard dollara “Şahdəniz”dən 15,5% pay aldı

Rusiyanın “Lukoil” şirkəti Azərbaycanın Xəzərdəki “Şahdəniz” yatağındakı payını artırır.

YeniAvropa xəbər verir ki, bu barədə şirkətin ötən gün yaydığı məlumatda bildirilib.

Qeyd edilib ki, “Lukoil” Malayziyanın “Petronas” şirkətindən “Şahdəniz” layihəsindəki  15,5 faizlik payını almaq barədə razılaşma imzalayıb.

Sövdələşmənin dəyəri 2,25 milyard dollardır. Sövdələşmə bəzi şərtlərin yerinə yetirilməsindən, o cümlədən SOCAR-ın razılığından sonra qüvvəyə minəcək.

“Rusiya kapitalının iştirak etdiyi minlərlə şirkətlə yanaşı “Lukoil” Rusiya-Azərbaycan əməkdaşlığının mühüm istiqamətlərinin inkişaf etdirilməsinə dair 2018-ci ildə dövlət başçılarının danışıqlarının gedişində imzalanmış fəaliyyət planının həyata keçirilməsinə inteqrə olunublar. Bizim “Şahdəniz” layihəsindəki payımızın artırılması milli iqtisadiyyatların perspektiv sahələrində yeni sinergiya imkanları açır”,- deyə şirkətin prezidenti Vahid Ələkbərov bildirib.

Qeyd edək ki, “Şahdəniz” yatağındakı 15,5 faizlik pay əvvəllər Norveçin “Statoil” şirkətinə məxsus olub. 2015-ci ildə Norveç şirkəti öz payını  “Petronas”a sataraq layihəni tərk edib.

Bir neçə gün əvvəl isə “Lukoil”  Xəzər dənizinin Azərbaycan sektorunda yerləşən Abşeron Yarımadasının Dayazsulu Hissəsində yerləşən kəşfiyyat layihəsindəki payının 25 faizini almaq barədə sövdələşmə imzalayıb.  Bu sövdələşmənin 2021-ci ilin sonuna qədər yekunlaşacağı gözlənilir. Həmin layihədəki üçüncü iştirakçı 50 faiz paya sahib olan SOCAR-dır.

Xatırladaq ki, Rusiya şirkətinin Azərbaycanın Xəzərdəki neft-qaz layihələrində iştirakını genişlənməsi Qərb şirkətlərinin bu layihələrdən çəkilməsi ilə paralel baş verir.