İranda koronavirusdan ölənlərin sayı 100 mini ötüb

18:59 19-08-2021 | 2681

İrana qarşı tətbiq edilən iqtisadi sanksiyalar koronavirusa qarşı səmərəli mübarizə aparmağa imkan vermir.

YeniAvropa yerli mətbuata istinadla xəbər verir ki, bu sözləri İranın səhiyyə naziri Səid Nəmaki deyib. O bildirib ki, sanksiyalar ölkəyə tibbi ləvazimatların və avadanlıqların idxalına maneə yaradır. İran daxili imkanları hesabına virusa qarşı mübarizə aparır. Nazir qeyd edib ki, pandemiyanın davam etdiyi müddətdə xəstəxanaların çarpayı sayı artırılıb və 1500 ədəd oksigen balonu ilə təmin olunub.

Qeyd edilib ki, hazırda İranda virusa yoluxanlar arasında ölüm halları artıb. Bunun səbəbi ölkədə koronavirusun “delta” variantının yayılmasıdır. Bu variant sürətlə yayılır və təhlükəlidir. Nazir insanları tibbi normalara ciddi əməl etməyə çağırıb.

İranın Səhiyyə Nazirliyinin bu gün verdiyi məlumata əsasən ölkə ərazisində 31 min 266 yoluxma, 564 ölüm halı qeydə alınıb. Bununla da İranda virusa yoluxanların ümumi sayı 4 milyon 587 min 683 nəfərə, yoluxaraq ölənlərin sayı isə 100 min 255-ə çatıb.

Xəstəxanalarda müalicə alan 7583 xəstənin vəziyyəti ağır olaraq qalır. Eyni zamanda, 3 milyon 840 min 568 xəstə sağalaraq evə buraxılıb.

İranda əhliyə peyvənd vurulması prosesi davam edir.