Gömrük idxal rüsumlarındakı süni  artımlar avtomobil bazarını çökdürür

Avtomobil bazarında bahalaşma müşahidə olunur. Mütəxəssislərin bildirdiyinə görə avtomobillərin qiymətində 5-10 faizədək bahalaşma var. Mart və aprel aylarından başlayan qiymət artımına səbəb kimi idxalın məhdudlaşdırılması və ya ölkəyə gətirilən nəqliyyat vasitələrinə şamil olunan gömrük ödənişlərinin hesablanması qaydalarının düzgün aparılmaması göstərilir.

 YeniAvropa xəbər verir ki,  "Əmlak" ekspert mərkəzinin direktoru Ramil Osmanlının sözlərinə görə, qiymət dəyişimləri idxalın azalması ilə əlaqədardır.

O, qeyd edib ki, idxalın azalmasının da müxtəlif səbəbləri var: "Bütövlükdə dövriyyədə olan nəqliyyat vasitələrinin bazara daxil olmasında qiymət artımı müşahidə olunur. Bu da təbii ki, tələblə bağlı olan məsələdir. Əslində Dövlət Gömrük Komitəsinin ölkəyə idxal edilən avtomobillərə tətbiq etdiyi rüsumlarla bağlı da neqativ fikirlər var. Müxtəlif mənbələrdən daxil olan məlumatlar göstərir ki, gömrük rüsumlarında süni və subyektiv artımlar olur”.

Ekspertin fikrincə, Azərbaycanda avtomobil idxalını stimullaşdırmaq, xüsusilə avtomobil parkının yenilənməsini təmin etmək üçün gömrük siyasətinə, eləcə də idxal qərarlarına yenidən baxılmalıdır: "Elektromobillərin, xüsusilə hibrit avtomobillərin ölkəyə idxalının stimullaşdırılması ilə bağlı ciddi addımlar atılmalıdır. Azərbaycan bu prosesdən kənarda qalmamalıdır. Avtomobil istehsalı bazar tələbin çox nisbi, heç bir faizini ödəyə bilmir. Belə olan halda Dövlət Gömrük Komitəsinin idxalla bağlı rüsumlarının bu dərəcədə qaldırılmasına ehtiyac görmürəm”. 

Qeyd edək ki, uzun illərdir ki, təkrar bazarda "Mercedes" markalı avtomobillər liderlik edirdi. Son illərdə bazarda digər markalı avtomobillər üstünlük təşkil etməyə başlayıb. 

Hazırda müştərilər daha çox qiyməti 10000-18000 manat arası olan ekonom avtomobillərə üstünlük verirlər.