Azərbaycanı Naxçıvanla birləşdirəcək yol ölkə iqtisadiyyatının inkişafında böyük rol oynayacaq
Zəngin yeraltı və yerüstü sərvətlərə malik olan Qarabağ torpağı artıq işğaldan azad edilib. Prezident İlham Əliyevin göstərişinə əsasən, işğaldan azad edilən torpaqlarda infrastrukturun qurulması, bərpa-quruculuq işlərinin aparılması istiqamətində prosesə artıq start verilib. Bu işlərin vahid konsepsiya əsasında həyata keçirilməsi nəzərdə tutulur.
YeniAvropa xəbər verir ki, bu fikirləri baş nazir Əli Əsədov bu gün parlamentdə hökumətin ötən ilin yekunlarına dair hesabatını təqdim edərkən səsləndirib.
Baş nazir bildirib ki, ərazilərin yenidən qurulması üçün dövlət büdcəsindən 2,2 milyard manat maliyyə vəsaiti ayrılıb. İlkin mərhələdə ərazilərin minalardan təmizlənməsi böyük əhəmiyyət kəsb edir.
Azğın düşmənin münaqişə zonasından kənarda yerləşən şəhər və kəndlərimizə də xeyli ziyan vurduğunu deyən Əli Əsədov diqqətə çatdırıb ki, mülki əhaliyə, dövlət əmlakına dəyən ziyanın aradan qaldırılması və tikinti işlərinin aparılması üçün lazımı işlər görülür.
“Azərbaycanı Naxçıvanla birləşdirəcək yol ölkə iqtisadiyyatının inkişafında böyük rol oynayacaq, ölkəmizin gücü daha da artacaq”, - deyə baş nazir vurğulayıb.
2345
2345
