Azərbaycanın xalq artisti, aktyor, teatr rejissoru Rafiq Əliyev vəfat edib.
YeniAvropa xəbər verir ki, R.Əliyev 71 yaşında dünyasını dəyişib.
Rafiq Hacıbaba oğlu Əliyev 14 noyabr 1949-cu ildə Füzuli rayonunun Merdinli kəndində anadan olub. 1974-cü ildə Azərbaycan Dövlət İncəsənət İnstitutunun Musiqili Komediya Aktyorluğu fakültəsinə qəbul olub. 1976-cı ildə Azərbaycan Dövlət Gənc Tamaşaçılar Teatrına işə dəvət olunub. Teatrda çalışdığı 30 ildən artıq dövrdə maraqlı obrazlar qalerayası yaradıb.
Bunlardan əlavə Rafiq Əliyev 40-dan artıq filmdə müxtəlif obrazları canlandırıb. O, həmçinin, bir prodüsser kimi də fəaliyyət göstərib. Azərbaycan Teatr xadimləri İttifaqı Yaradıcı Gənclər Mərkəzi-Laboratoriyasının 2007-ci ildə hazırladığı Qurban Səidin "Əli və Nino" ritual faciəsinin prodüsseri olub.
O, 2004-cü ilin mayında Azərbaycan Teatr Xadimləri İttifaqının Konfransında İttifaqın yaradıcılıq məsələləri üzrə sədr müavini vəzifəsinə seçilib. Azərbaycan teatr sənəti qarşısında göstərdiyi xidmətlərə görə 1990-cı ildə "əməkdar artist", 2007-ci ildə isə "xalq artisti" fəxri adlarına layiq görülüb. 2017-ci ildən Azərbaycan Respublikası prezidentinin fərdi təqaüdçüsü olub .
Allah rəhmət eləsin!
2548
2548
