Karantin cərimələrini ödəməyən şəxslərə bir sıra qadağalar qoyulacaq

11:32 14-04-2020 | 2457

Koronavirus pandemiyası ilə əlaqədar Azərbaycanda tətbiq edilən karantin rejiminin pozulmasına görə tətbiq edilən cərimələri ödəməkdən imtina edən şəxslərin ölkədən çıxışına qadağa qoyulacaq, avtomobili varsa, saxlanılacaq və cərimə ödənilənədək avtomobil cərimə meydançasında qalacaq.

YeniAvropa xəbər verir ki, bu fikirləri Daxili İşlər Nazirliyinin(DİN) mətbuat xidmətinin rəisi, polis polkovniki Ehsan Zahidov səsləndirib. Onun sözlərinə görə, karantin rejimi qaydalarını pozan şəxslər barəsində DİN əməkdaşları tərəfindən tərtib edilən cərimə protokolları İnzibati Xətalar Məcəlləsinin 211-ci maddəsinə uyğun olaraq 100 manat dəyərində müəyyənləşib və vətəndaşlar da buna ciddi yanaşmalıdırlar.

"Karantin rejiminin pozulmasına görə tətbiq edilən cərimələrin ödətdirilməsi mexanizmi mövcuddur. Karantin rejimi qaydalarını pozan şəxsə barəsində tərtib edilən protokoldan qanunamüvafiq olaraq, məhkəməyə müraciət etməsi üçün 10 gün müddət verilir. Yəni, vətəndaş özünü günahkar hesab etmirsə, protokoldan şikayət verə bilər. On gün müddət tamam olanda əgər şikayət olunmazsa, protokol qanuni qüvvəyə minmiş sayılır. Bundan sonra vətəndaşa cəriməni ödəmək üçün 30 gün vaxt verilir. Bu 40 gün ərzində isə sahə müvəkkilləri adına protokol tərtib edilən şəxslərə cəriməni ödəmələri barədə xəbərdarlıq edir.

40 gündən sonra cəriməni ödəməyən şəxslərin iş yerinə və yaxud yaşadığı ünvana rəsmi bildirişlər göndəriləcək ki, dərhal cəriməni ödəsinlər. Cəriməni ödəməkdən imtina edən şəxslərin ölkədən çıxışına qadağa qoyulacaq, avtomobili varsa, saxlanılacaq və cərimə ödənilənədək avtomobil cərimə meydançasında qalacaq. Cərimələrin ödətdirilməsi üçün məcbur etmə üsullarının hamısından istifadə olunacaq. Karantin rejimini pozduğuna görə barəsində inzibati cərimə tətbiq edilənlər bilməlidirlər ki, cəriməni mütləq şəkildə vaxtında ödəməlidirlər. Əks təqdirdə barələrində qanunvericilikdə nəzərdə tutulmuş müvafiq tədbirlər görüləcəkdir", -deyə Ehsan Zahidov vurğulayıb.