"Qhtxeber.az" saytının 10 illik yubileyi qeyd olunub

Dekabrın 18-də Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının "qhtxeber.az" saytının 10 illik yubileyi münasibətilə  tədbir keçirilib. Tədbirdə, həmçinin Şuranın elan etdiyi “SƏLİS Jurnalist” yazı müsabiqəsinin qalibləri mükafatlandırılıblar.

YeniAvropa xəbər verir ki, tədbirdə "qhtxeber.az" saytının baş redaktoru Sənan Nəcəfov saytın fəaliyyəti ilə bağlı məlumat verib.

Milli Məclisin deputatı, Şuranın sədri Azay Quliyev yubiley münasibətilə təbriklərini çatdıraraq bildirib ki, "qhtxeber.az" saytı işinin öhdəsindən layiqincə gəlib: “Saytının yaranmasından ötən on ildə qarşıya qoyulan vəzifələrin öhdəsindən bacardığımız qədər gəlməyə çalışdıq. Düşünürəm ki, kollektiv bu missiyanı şərəflə yerinə yetirib. Qarşıda hələ görüləcək işlər çoxdur”.

A.Quliyev “SƏLİS Jurnalist” yazı müsabiqəsinin qaliblərini təbrik edərək bildirib ki, müsabiqə 3 mövzu – “Ölkədə aparılan iqtisadi, sosial və kadr islahatları”, “İctimai nəzarətin effektiv və milli maraqların qorunması” və “QHT-lərlə dövlət qurumları arasında əməkdaşlığa dair yeni imkanlar və perspektivlər” üzrə keçirilib. Müsabiqəyə təqdim olunan 51 yazı arasından 9-u münsiflər heyəti tərəfindən mükafata layiq görülüb.

Jurnalist yazılarının qiymətləndirilməsi üzrə münsiflər heyətinin üzvləri xalq şairi Sabir Rüstəmxanlı, “Yeni Müsavat” Media Qrupunun rəhbəri Rauf Arifoğlu, “APA Group”un rəhbəri Vüsalə Mahirqızı və “525-ci qəzet”in baş redaktoru Rəşad Məcid olublar.

Sabir Rüstəmxanlı və Rauf Arifoğlu yazıların ədalətli seçim əsasında qiymətləndirildiyini bildiriblər.

Tədbirin sonunda müsabiqənin qalibləri mükafatlandırılıb.
“Ölkədə aparılan iqtisadi, sosial və kadr islahatları” mövzusu üzrə qaliblər Səbuhi Məmmədli (I yer), Asif Nərimanlı (II yer) və Həbibə Abdulla (III yer) olub.

“İctimai nəzarətin effektiv təşkili və milli maraqların qorunması” mövzusu üzrə qaliblər Sevinc Telmanqızı (I yer), Seymur Əliyev (II yer) və Rumiyə Miraslan (III yer) olub.

“QHT-lərlə dövlət qurumları arasında əməkdaşlığa dair yeni imkanlar və perspektivlər” mövzusu üzrə qaliblər isə Fərəh Sabirqızı (I yer), Fidan Afər və Ruhiyyə Daşsalahlı (III yer) olub.