logo

Hövsanda iki il əvvəl törədilən qəsdin üstü açılıb

09:49 25-07-2022 | icon 476
Hövsanda iki il əvvəl törədilən qəsdin üstü açılıb

Baş Prokurorluq, Daxili İşlər Nazirliyi və Ədliyyə Nazirliyi Penitensiar Xidməti əməkdaşlarının birgə fəaliyyəti nəticəsində əvvəlki illərdən bağlı qalmış daha bir qəsdən adam öldürmə cinayətinin üstü açılıb.

Baş Prokurorluğun və Daxili İşlər Nazirliyinin mətbuat xidmətlərindən YeniAvropa-ya daxil olan birgə məlumatda bildirilib ki, 2020-ci il oktyabrın 11-də paytaxt sakini Rüstəm Bayramovun meyiti Suraxanı rayonunun Hövsan qəsəbəsində asfalt yolun kənarında aşkar edilib.

Faktla bağlı Suraxanı rayon Prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb istintaq aparılsa da, cinayəti törətmiş şəxsi müəyyən etmək mümkün olmadığından iş üzrə icraat dayandırılıb.

Sonradan cinayət işi Baş Prokurorluqda öyrənilərək iş üzrə icraatın dayandırılması haqqında qərar ləğv edilib və istintaqın davam etdirilməsi Baş Prokurorluğun İstintaq idarəsinə tapşırılıb.

İstintaqla müəyyən edilib ki, 2020-ci il oktyabr 10-u saat 22 radələrində Radiq Feyziyev, Tahir Ələkbərov və Rəşad Kərimovun şəxsi münasibətlər zəminində aralarında baş vermiş mübahisə zamanı qabaqcadan əlbir olmuş bir qrup şəxs halında Rüstəm Bayramovun baş və bədəninin müxtəlif nahiyələrinə yumruq, təpik və yerdən götürdükləri daş parçaları ilə zərbələr endirərək onu qəsdən öldürmələrinə əsaslı şübhələr var.

Toplanmış mötəbər sübutlar əsasında cari il iyulun 23-də hər üç şəxsə Cinayət Məcəlləsinin 120.2.1-ci (qabaqcadan əlbir olan bir qrup şəxs tərəfindən adam öldürmə) maddəsi ilə ittiham elan edilərək barələrində həbs qətimkan tədbiri seçilib.