logo

Bu gün “OPEC+” nazirlərinin görüşü olacaq

14:49 17-09-2020 | icon 2450
Bu gün “OPEC+” nazirlərinin görüşü olacaq

Sentyabrın 17-də OPEC-ə üzv və kartelə üzv olmayan ölkələrin (“OPEC+”) nazirlərinin görüşü olacaq. 

YeniAvropa xəbər verir ki, bu gün həmçinin “OPEC+” Nazirlərinin Birgə Monitorinq Komitəsinin (JMMC) növbəti iclası da keçiriləcək Azərbaycan hər iki görüşdə təmsil olunacaq.

Xatırladaq ki, dünən “OPEC+” Birgə Texniki Komitəsinin (JTC) videokonfrans formatında 44-cü iclası keçirilib. Birgə Texniki Komitə JMMC-yə neft bazarındakı inkişaflarla bağlı tövsiyələr verir.

Qeyd edək ki, “OPEC+” üzrə gündəlik neft hasilatının 2018-ci ilin oktyabr ayı səviyyəsindən 7,7 milyon barrel ixtisarı prosesi çərçivəsində Azərbaycan avqustda sutkada xam neft hasilatını 133,4 min barrel azaldıb. “Əməkdaşlıq Bəyannaməsi”nə əsasən, 2018-ci ilin oktyabr ayında gündəlik xam neft hasilatı 718 min barrel olan Azərbaycan cari ilin avqust-dekabr aylarında neft istehsalını sutkada 131 min barrel azaltmaqla 587 min barrel həcmində saxlamalıdır. Öhdəliklərin icrası məqsədilə gündəlik xam neft hasilatı 2018-ci ilin oktyabr ayındakı səviyyələrdən, “Azəri-Çıraq-Günəşli”də 567 min barreldən azaldılaraq 461 min barreldə, SOCAR (“Azneft” İB, birgə müəssisələr və əməliyyat şirkətləri) üzrə isə 151 min barreldən ixtisar edilərək 126 min barrel həcmində saxlanılmalıdır.

12 aprel tarixli “OPEC+” razılaşmasının gündəlik xam neft hasilatının ümumilikdə 7,7 milyon barrel azaldılması ilə bağlı ikinci mərhələsi 1 avqust - 31 dekabr tarixlərini əhatə edir.