Futbol üzrə “Euro-2020”nin final mərhələsi oyunlarına satılmış biletlərin hamısı 2021-ci ildə keçiriləcək turnir üçün etibarlı olacaq.
YeniAvropa xəbər verir ki, biletlərini geri qaytarmaq istəyən bilet sahibləri iyunun 18-dən 25-dək "euro2020.com/tickets" linki vasitəsilə biletlərini geri tələb edə bilərlər. Bu, biletlərin qaytarılması üçün son şans olacaq.
Turnirə play-off mərhələsi vasitəsilə vəsiqə qazanacaq dörd milli komandanın azarkeşləri də daxil olmaqla bütün azarkeşlər üçün bilet satışı tarixləri növbəti günlərdə açıqlanacaq.
Xatırladaq ki, koronavirus pandemiyasına görə 2021-ci ilə təxirə salınan çempionata Bakı, Sankt-Peterburq, London, Münxen, Roma, Buxarest, Dublin, Kopenhagen, Bilbao, Qlazqo, Budapeşt və Amsterdam şəhərləri ev sahibliyi edəcək.
Turnirin “A” qrupunun İsveçrə-Uels, Türkiyə-Uels və Türkiyə-İsveçrə oyunlarına, həmçinin dörddəbir final mərhələsinin bir matçına Bakı Olimpiya Stadionu ev sahibliyi edəcək. İsveçrə-Uels oyunu iyunun 12-də, Türkiyə-Uels qarşılaşması ayın 16-da, Türkiyə-İsveçrə matçı isə dörd gün sonra təşkil olunacaq. Bakıda baş tutacaq dörddəbir final mərhələsinin bir görüşü isə iyulun 3-də keçiriləcək.
Qeyd edək ki, “Euro-2020” gələn il iyunun 11-dən iyulun 11-dək keçiriləcək.
Elşən Balayev
3500
3500
