OPEC+ iclası sabah keçiriləcək

İyunun 6-da  neft hasilatının azaldılmasına dair saziş əldə edən ölkələrin (OPEC+)   videokonfransl formatında növbəti iclası keçiriləcək.

YeniAvropa xarici KİV-ə istinadla xəbər verir  ki, konfransda Azərbaycan da təmsil olunacaq. 

Qeyd edək ki, Neft İxrac Edən Ölkələr Təşkilatının (OPEC) Nazirlər Şurasının 179-cu iclası videokonfrans formatında iyunun 9-da təşkil olunacaq. Azərbaycanın da daxil olduğu qeyri-OPEC ölkələrinin (“OPEC+”) nazirlərinin videokonfrans formatında 11-ci görüş isə iyunun 10-na planlaşdırılırdı.

Xatırladaq ki, “OPEC+” ölkələri nazirlərinin bu il aprelin 9-u və 12-də keçirilən görüşlərinin nəticəsi olaraq qəbul edilmiş və gündəlik xam neft hasilatının may-iyunda 9,7 milyon barrel, iyul-dekabrda 7,7 milyon barrel, 2021-ci ilin yanvarından 2022-ci ilin aprelinədək isə 5,8 milyon barrel azaldılmasını nəzərdə tutan “Əməkdaşlıq Bəyannaməsi”nə Azərbaycan da qoşulub.

2018-ci ilin oktyabr ayında gündəlik xam neft hasilatı 718 min barrel olan Azərbaycan yeni razılaşma çərçivəsində hasilatı bu ilin may-iyun aylarında həmin səviyyədən 164 min barrel azaltmalıdır. Bu müddət ərzində Azərbaycan gündəlik xam neft hasilatını 554 min barrel həcmində saxlamalıdır.

Azərbaycanın öhdəlikləri iyul-dekabr aylarında 131 min barrel, 2021-ci il və 2022-ci ilin aprel ayı ərzində isə 98 min barrel müəyyənləşib. Kvotalara müvafiq olaraq ölkəmizdə gündəlik xam neft hasilatının həcmi iyulun 1-dən ilin sonunadək 587 min barreli, 2021-ci ilin yanvarından 2022-ci ilin aprelinədək isə 620 min barreli keçməməlidir.

Mayın 1-dən etibarən “Azəri-Çıraq-Dərinsulu Günəşli” yataqlarında, “Azneft” İB, Birgə Müəssisələr və Əməliyyat Şirkətləri üzrə gündəlik hasilatın azaldılması prosesi həyata keçirilir.