Bakıda Azərbaycan-İtaliya Hökumətlərarası Komissiyanın V iclası keçiriləcək

İyulun 8-də Bakıda Azərbaycan-İtaliya Hökumətlərarası Komissiyanın  V iclasına hazırlıq məsələləri müzakirə edilib.

Energetika Nazirliyindən YeniAvropa-ya bildirilib ki, nazir Pərviz Şahbazov İtaliya Xarici İşlər və Beynəlxalq Əməkdaşlıq Nazirliyinin dövlət katibi Quqlielmo Pikkinin rəhbərlik etdiyi nümayəndə heyəti ilə görüşüb.

Nazir iki ölkə münasibətlərinin bütün sahələr üzrə uğurla inkişaf etdiyini və bu əlaqələrin yüksək səviyyəli qarşılıqlı səfərlərlə daha da möhkəmləndiyini bildirib. İtaliya şirkətlərinin Azərbaycanda çoxşaxəli fəaliyyətinə toxunan nazir onların investor kimi fəaliyyətlərini genişləndirilməsi, iqtisadiyyatın şaxələndirilməsi prosesində iştirakları üçün imkanların olduğunu qeyd edib.

P.Şahbazov İtaliya ilə iqtisadi tərəfdaşlıqda enerji sektorunun vacib rolunu diqqətə çatdıraraq TAP layihəsinin İtaliya istehlakçıları üçün faydalarından danışıb.

Cənub Qaz Dəhlizinin hər iki ölkə üçün əhəmiyyət daşıdığını vurğulayan nazir müavini Q.Pikki TAP-ın enerji resurslarının şaxələndirilməsində rolunu yüksək qiymətləndirib və layihənin vaxtında başa çatması üçün mövcud dəstəyi diqqətə çatdırıb.

Görüşdə iqtisadi əməkdaşlıq üzrə Hökumətlərarası Komissiyanın cari ildə keçiriləcək 5-ci iclasına hazırlıq, eləcə də qarşılıqlı maraq doğuran digər məsələlər müzakirə edilib.

Xatırladaq ki, Azərbaycan-İtaliya Hökumətlərarası Komissiyanın IV islası i13 yun 2016-cı ildə Romada keçirilib. İclasda iştirak etmək üçün  sabiq  energetika naziri Natiq Əliyevin rəhbərliyi ilə nazir  Azərbaycan nümayəndə heyəti İtaliyaya səfər edib.