Rumıniyanın paytaxtı Buxarestdə keçirilən qitə birinciliyində Azərbaycan komandasının heyətində çıxış edən sərbəst güləşçimiz Hacı Əliyev (65 kq) bütün rəqiblərini üstələyərək qızıl medal qazanaraq karyerasında üçüncü dəfə Avropa çempionu olub.
YeniAvropa Azərbaycan Güləş Federasiyasının(AGF) saytına istinadla xəbər verir ki, yarışdan sonra qələbə ilə bağlı təəssüratlarını AGF-nin saytı ilə bölüşüb. Üçqat Avropa və dünya çempionu qələbəsini Aprel döyüşlərindən şəhid olan Vətən övladlarının xatirəsinə həsr etdiyini vurğulayaraq deyib: “Gördüyünüz kimi çox çətin səbətə düşmüşdüm. Finala qədər güclü rəqiblərlə qarşılaşdım. Bununla belə, titulumu qoruya bildim. Yarış mənim üçün ağır keçdi. Növbəti dəfə Avropa çempionu olduğum üçün şadam. Qələbəmi Aprel şəhidlərinin ruhuna ithaf edirəm. Düzdür, bu, onları geri qaytarmayacaq. Ancaq ümid edirəm ki, bununla az da olsa, onların ruhlarını şad etmiş olaram”.
Qarşıdakı yarışlara inamla hazırlaşdığını qeyd edən idmançı bildirib: “Yavaş-yavaş formamın zirvəsinə çatıram. Ancaq dayanmaq olmaz. Hazırlıqları daha da artırmaq lazımdır. Çünki bizi çox güclü dünya çempionatı gözləyir. Bu mötəbər yarışa çox yaxşı hazırlaşmalıyıq”.
3024
3024
