“Azercell” Türkiyədə zəlzələdən zərər çəkənlərə dəstəyini davam etdirir. Şirkət qardaş ölkəyə 3 yük maşını humanitar yardım göndərib. Yardım təbii fəlakətdən zərər çəkənlərə kömək etmək üçün generator və digər həyati zəruri ləvazimatlardan ibarətdir.
YeniAvropa xəbər verir ki, humanitar yüklərdən əlavə, lider operator zəlzələ bölgəsində davamlı mobil bağlantını təmin etmək məqsədilə bir neçə mobil baza radiostansiyası, texniki sursat göndərir. Telekommunikasiya infrastrukturunun bərpası üzrə təxirəsalınmaz kompleks işlərin aparılmasında yerli mütəxəssislərə dəstək göstərəcək “Azercell”in bir qrup mühəndisini Türkiyəyə ezam edir. Yardımın fəlakət bölgəsinə tez və səmərəli çatdırılması üçün şirkət aidiyyəti təşkilatlarla sıx əməkdaşlıq edir.
Humanitar yardımın və texniki dəstəyin göstərilməsi “Azercell”in bu dağıdıcı təbii fəlakətin nəticələrinin aradan qaldırılması istiqamətində qəbul etdiyi qardaş ölkəyə dəstək proqramının bir hissəsidir.
“Azercell Könüllüləri” komandası şirkətin əməkdaşları arasında Türkiyədə zəlzələdən zərər çəkənlərə kömək etmək üçün zəruri əşya və maddi yardımın toplanması kampaniyası təşkil edib. Bundan əlavə, şirkət “Nargis” Fondu və Azərbaycan Qızıl Aypara Cəmiyyəti ilə əməkdaşlıq çərçivəsində “Azercell” abunəçilərinin öz ianələrini SMS vasitəsilə göndərə biləcəkləri qısa nömrələri istifadəyə verib.
1666
1666
