“Özünü qoru, çevrəni xilas et” devizi ilə Media Hərəkatı yaradılıb

Koronavirus pandemiyası ilə mübarizədə mövcud təhlükənin başa düşülməsi, vəziyyətin ciddiliyinin vətəndaşlar tərəfindən qəbul edilməsi, özünüqoruma vasitələrindən istifadənin həyat tərzinə çevrilməsi üçün Ekologiya və Təbii Sərvətlər Nazirliyinin mətbuat katibi İradə İbrahimovanın təşəbbüsü ilə “Özünü qoru, çevrəni xilas et” devizi ilə Media Hərəkatı yaradılıb.

YeniAvropa xəbər verir ki, həmin hərəkata qoşulan media təmsilçiləri və jurnalistlər virusa yoluxmanın qarşısının alınması üçün qoyulan tələblərə mütləq əməl olunmasının vacibliyini, vəziyyətin ciddiliyini anladan maarifləndirici çağırışlar edəcəklər.

İradə İbrahimovanın sözlərinə görə, hərəkata qoşulan kütləvi informasiya vasitələrinin nümayəndələrinin çağırışları bütün xalqa ünvanlanıb: “Yaxınlarınızı, ətrafınızı riskə atmayın, özünüzü, böyüklərinizi, çevrənizi xilas etmək üçün özünüqoruma vasitələrindən istifadə edin. Çətin də olsa, həyatınız, sağlamlığınız naminə yeni qaydalarla yaşamağı öyrənin, məsafə saxlayın, qoruyucu vasitələrdən istifadə edin, bir sözlə, qoyulan tələblərə ciddi riayət edin.

Başımızın üstünü alan təhlükə barədə biz hər gün sarsıdıcı məlumatlar alır, virusa yoluxan xəstələrin yaşamaq uğrunda mübarizə apardığının şahidi oluruq. Buna görə də gəlin onları sağaltmağa, həyata qaytarmağa çalışan, özlərini riskə atan tibb işçilərinin fədakarlığını, əziyyətini, qəhrəmanlığını qiymətləndirək və onlara dəstək olaq. Üzləşdiyimiz bu çətin vəziyyətdə hər birimiz özümüzü qorumalıyıq ki, yaxınlarımız, doğmalarımız, dostlarımız sağlam qalsın. Bir daha vətəndaşlarımızı məsuliyyətli olmağa, bütün qaydalara ciddi əməl etməyə çağırırıq. Biz vətəndaş məsuliyyəti nümayiş etdirməsək, özümüzü və yaxınlarımızı qorumasaq, bu xəstəlik daha uzun müddət davam edəcək. Xəstəlik qapımızı döyməmiş, doğmalarımıza yoluxmamış, sevdiklərimizi bizdən ayırmamış milli birlik və həmrəylik nümayiş etdirərək ona qalib gələk”.