Yeni koronavirusdan qorunmaq məqsədilə üzərində vaksinin klinik sınağı keçiriləcək ilk iştirakçıya bu gün eksperimental doza veriləcək. Bu barədə Tramp administrasiyasının nümayəndəsi məlumat verib.
YeniAvropa xarici KİV-ə istinadla xəbər verir ki, Sietldə yerləşən “Kayzer Permanente” elmi-tədqiqat səhiyyə İnstitutunda keçiriləcək sınağı ABŞ Milli Səhiyyə İnstitutu maliyyələşdirir. Məmurlar iştirakçıların adlarını açıqlamayacaq.
Milli Səhiyyə İnstitutu və “Modern Inc” biotexnologiya şirkətinin birgə hazırladıqları test peyvəndi müxtəlif dozalarla 45 gənc, sağlam könüllü üzərində tətbiq olunacaq. Tədqiqatçıların bəyanatında bildirilir ki, peyvəndlərin tərkibində virusun özünün olmadığına görə, iştirakçılar peyvənddən yoluxa bilməzlər. Tədqiqatın məqsədi vaksinin heç bir təhlükəli fəsad törətməyəcəyinə əmin olmaq və bu sahədə daha böyük sınaqlar üçün zəmin yaratmaqdan ibarətdir.
Milli Səhiyyə İnstitutunun direktoru doktor Entoni Fauçinin sözlərinə görə, hətta ilkin təhlükəsizlik testləri uğurla keçdiyi halda belə, peyvəndin geniş miqyasda tətbiqi üçün 12 aydan 18 ayadək vaxt tələb olunur.
2744
2744
