İlham Əliyev Rusiyaya yeni səfir təyin edib

Prezident İlham Əliyev oktyabrın 1-də Azərbaycan Respublikasının Rusiya Federasiyasında fövqəladə və səlahiyyətli səfirinin təyin edilməsi haqqında sərəncam imzalayıb. 

YeniAvropa xəbər verir ki, bu barədə prezidentin mətbuat xidməti məlumat yayıb.

Sərəncamda deyilir: "Rəhman Sahib oğlu Mustafayev Azərbaycan Respublikasının Rusiya Federasiyasında fövqəladə və səlahiyyətli səfiri təyin edilsin".

Digər bir sərəncamla Rəhman Mustafayev Azərbaycan Respublikasının Niderland Krallığında fövqəladə və səlahiyyətli səfiri, eyni zamanda Azərbaycan Respublikasının Kimyəvi Silahların Qadağan Olunması üzrə Təşkilatda daimi nümayəndəsi vəzifələrindən geri çağırılıb.

Rəhman Mustafayev 26 sentyabr 1963-cü ildə Bakı şəhərində anadan olub.

1980–1985-ci illərdə Moskva Dövlət Universitetinin Beynəlxalq İqtisadi Münasibətlər fakültəsində təhsil alıb.
1985–1987-ci illərdə hərbi xidmətdə olub.
1993–1994-cü illərdə Prezidentin İcra Aparatında İnformasiya-analiz xidmətinin baş məsləhətçisi işləyib.
1994–1997-cı illərdə Azərbaycanın Rusiyadakı səfirliyinin əvvəlcə üçüncü, sonra ikinci, ardınca birinci katibi işləyib.
1997–1999-cu illərdə Dövlət Əmlak Komitəsinin Xarici əlaqələr şöbəsinin müdiri olub.
2000–2006-cı illərdə Rusiyadakı səfirliyimizdə müşavir olub. 2006-cı ilin may-noyabr aylarında Xarici İşlər Nazirliyinin birinci ərazi idarəsinin direktor müavini kimi çalışıb.
2006-cı ilin noyabrından 2009-cu ilədək Azərbaycan Respublikası Xarici İşlər Nazirliyinin birinci ərazi idarəsinin direktoru kimi fəaliyyət göstərib.

O, həmçinin Azərbaycanın Yunanıstan Respublikasındakı və eyni zamanda Albaniya Respublikasında fövqəladə və səlahiyyətli səfiri vəzifəsinə çalışıb. 

R.Mustafayev 2017-2022-ci illərdə Azərbaycanın Fransadakı, 2022-2024-cü illərdə isə Niderland Krallığındakı fövqəladə və səlahiyyətli səfiri kimi çalışıb.

İngilis, fransız, rus və ərəb dillərini bilir.

R.Mustafayev bu vəzifədə Xalq artisti, diplomat Polad bülbüloğlunu əvəzləyib.

Qeyd edək ki, Polad Bülbüloğlu 2006-2024-cü illərdə Azərbaycan Respublikasının Rusiya Federasiyasında fövqəladə və səlahiyyətli səfiri olub. O, Milli Məclisin 7-ci çağırış deputatı seçildiyindən bu vəzifəsindən azad edilmişdi.