Bakıda TürkPA-nın 15 illiyinə həsr edilmiş konfrans keçirilib

Noyabrın 21-də Bakıda Türkdilli Ölkələrin Parlament Assambleyasının (TürkPA) 15 illiyinə həsr olunmuş konfrans keçirilib.

YeniAvropa xəbər verir ki, tədbirdə çıxış edən qurumun baş katibi Mehmet Süreyya Er deyib: “TürkPA-nın gördüyü işlər üzv dövlətlər tərəfindən hər zaman dəstəklənib. TürkPA regional və beynəlxalq təşkilatlarla geniş əlaqələr qurub, münasibətlərini genişləndirir”.

O əlavə ki, Türk dünyasında gedən proseslərdə TürkPA fəallıq nümayiş etdirir.

Türkiyə Böyük Millət Məclisinin üzvü Osman Mesten vurğulayıb ki, hazırda Şərq dövlətləri inkişaf mərhələsinə qədəm qoyub. Buna zəmin yaradan bir neçə amil var. Belə ki, ortaq tarix və dil, əhalinin artan sayı birgə əməkdaşlığı inkişaf etdirən əsas məsələlərdəndir.

O deyib ki, qlobal imperializmə, eyni zamanda, islamofobiyaya qarşı mübarizə üçün Türk dünyasının birgə əməkdaşlığı vacibdir.

Digər çıxış edənlər Türk dünyasının birləşməsinin tarixi zərurətə çevrildiyini vurğulayıblar. Ortaq mədəniyyətin, tarixin, dilin, dinin qarşılıqlı əməkdaşlığın inkişafına zəmin yaratdığı diqqətə çatdırılıb. Eyni zamanda, Türk dövlətlərinin bütün sahələrdə əməkdaşlığının önəmi qeyd olunub, bu barədə təkliflər səsləndirilib.

Tədbirdə Türk dövlətləri arasında təhsil sahəsində münasibətlərin, o cümlədən əlifba və dil birliyinin vacibliyi, tələbə təqaüdlərinin təsis olunmasının əhəmiyyəti barədə fikir mübadiləsi aparılıb.

Konfrans TürkPA-nın keçmişi, bugünkü vəziyyəti və perspektivləri haqqında müzakirələrlə yekunlaşıb.

Sonra ailə fotosu çəkdirilib.

Qeyd edək ki, konfransda Milli Məclisin deputatları, Türkiyənin, Qırğızıstanın, Özbəkistanın, Şimali Kiprin, həmçinin Qara Dəniz İqtisadi Əməkdaşlıq Təşkilatının (QİƏT), “Türk Kültür və Sənətləri Ortaq Yönətimi”nin (TÜRKSOY), Türk Dövlətləri Təşkilatının (TDT), Müstəqil Dövlətlər Birliyinin (MDB) nümayəndələri iştirak ediblər.