Müdafiə Nazirliyi dəniz komandosu axtarır

Azərbaycan Respublikası Hərbi Dəniz Qüvvələrinin (HDQ) “Dəniz komando təməl kursu”na könüllü daxil olmaq arzusunda olan ən azı ümumi orta təhsilli, qanunla müəyyənləşdirilmiş müddətli həqiqi hərbi xidmətini başa vurmuş, 28 yaşınadək hərbi vəzifəlilər bu il noyabrın 25-dək müvafiq sənədlərlə birlikdə Hərbi Dəniz Qüvvələrinin qərargahında fəaliyyət göstərən qəbul komissiyasına müraciət edə bilərlər.

Bu barədə Müdafiə Nazirliyinin mətbuat xidmətindənYeniAvropa-ya məlumat verilib.

Bildirilib ki, "Dəniz komando təməl kursu"na qəbul olunmaq üçün müraciət etmiş vətəndaşlar qəbul komissiyası tərəfindən hərbi xidmətə yararlılıq dərəcələrinin müəyyən edilməsi məqsədilə Hərbi Dəniz Qüvvələrinin poliklinikasına göndərilir. Hərbi Həkim Komissiyasının qərarına əsasən hərbi xidmətə yararlı hesab edilmiş və boyu 170 santimetrdən yuxarı olan şəxslər qəbul imtahanlarına buraxılır.

Fiziki hazırlığı, üzmə bacarığı, ümumi bilik səviyyəsi, düşünmə qabiliyyəti, peşə maraqları, ünsiyyət qurmaq, liderlik və qərar qəbuletmə bacarıqları, həmçinin fərdi-psixoloji və digər keyfiyyətlərinin öyrənilməsi məqsədilə keçirilən imtahanları müvəffəqiyyətlə vermiş namizədlər kursa qəbul edilirlər.

Kursun müddəti dörd aydır. Kursu müvəffəqiyyətlə başa vuran vətəndaşlarla üç il müddətinə bağlaşma imzalanır və onlar ixtisaslarına uyğun müvafiq vəzifələrə təyin olunurlar.

Namizədlər qəbul komissiyasına müraciət edərkən müvafiq sənədləri təqdim etməlidirlər. Sənədlərin siyahısı nazirliyin saytında yerləşdirilib.

Ünvan: Bakı şəhəri, Qaradağ rayonu, "Puta" hərbi şəhərciyi (Hərbi Dəniz Qüvvələrinin qərargahı).

Müraciət etmə vaxtı: bu il noyabrın 25-dək hər gün (bazar günləri istisna olmaqla) saat 09:00-dan 18:00-dək.

Qeyd: Müddətdən artıq həqiqi hərbi xidmətdən “Hərbi xidmətkeçmə haqqında” Əsasnamənin 156-cı maddəsinin “e” bəndinə (xidməti uyğunsuzluğa görə) müvafiq olaraq ehtiyata buraxılmış və ya məhkumluğunun ödənilməsindən asılı olmayaraq məhkum olunmuş hərbi vəzifəlilərin kursa qəbul üçün müraciət etmələri məqsədəuyğun deyildir.