Azərbaycan Ordusunun Qarabağda həyata keçirdiyi antiterror tədbirləri Ermənistanın 2020-ci il noyabrın 10-da əldə olunan razılaşma çərçivəsində öhdəliklərini yerinə yetirməməsi səbəbindən baş verib.
YeniAvropa xəbər verir ki, bu barədə Türkiyənin milli müdafiə naziri Yaşar Güler “Milliyet” qəzetinə müsahibəsində deyib.
“Ermənistan 44 günlük müharibə nəticəsində atəşkəs sazişinə imza atıb və bu şərtləri yerinə yetirməlidir. Qarabağda yerləşən terrorçular oradakı mədənlərdə hasilat işləri aparır və yolların açılması barədə xəbərdarlıqlara məhəl qoymurdular. Nəticədə Azərbaycan onların cavabını verdi. Bir gün davam edən tədbirlərdən sonra separatçılar silahlarını təhvil verməyə, təslim olmağa və Azərbaycan ərazilərini tərk etməyə razılıq verdilər”, - deyə nazir bildirib.
Onun sözlərinə görə, Rusiya Qarabağ torpaqlarının Azərbaycana aid olduğunu etiraf etmək məcburiyyətində qalıb. Yaşar Güler Azərbaycanın Qarabağda apardığı antiterror tədbirlərinin “uzunmüddətli sülhə doğru addım olacağına” əminliyini ifadə edərək deyib: “Ermənistan öhdəliklərini layiqincə yerinə yetirsə və sülh sazişinin şərtləri qısa müddət ərzində reallaşsa, regionda sülh və əmin-amanlıq mühiti bərqərar olacaq”.
Bu yaxınlarda Ermənistan və ABŞ hərbçiləri arasında baş tutan təlimlərə münasibət bildirən Yaşar Güler həmin tədbirləri əhəmiyyətli hesab etmədiyini, lakin hazırkı gərginlik şəraitində düzgün anlaşılmayacağını vurğulayıb.
1400
1400
