logo

AQTA bir neçə ölkədən quş əti iidxalına məhdudiyyət qoyub

16:12 24-01-2023 | icon 1190
AQTA bir neçə ölkədən quş əti iidxalına məhdudiyyət qoyub

Azərbaycan Qida Təhlükəsizliyi Agentliyi(AQTA) başqa ölkələrdən respublikamızın ərazisinə keçə biləcək yoluxucu heyvan xəstəliklərindən qorunmaq məqsədilə Ümumdünya Heyvan Sağlamlığı Təşkilatından (WOAH) daxil olan məlumatlar əsasında dünyadakı epizootik vəziyyətə uyğun olaraq müvafiq tədbirlər həyata keçirir.

Agentliyin İnformasiya təminatı və innovativ həllər şöbəsindən YeniAvropa-ya verilən məlumata görə, Ümumdünya Heyvan Sağlamlığı Təşkilatının rəsmi məlumatlarına əsasən, Fransanın Yeni Akvitanya regionunda və Rusiyanın Mari El Respublikasında Nyukasl, Avstriyanın Yuxarı Avstriya inzibati ərazi vahidində, Almaniyanın Meklenburq-Ön Pomeraniya və Bavariya vilayətlərində, Çexiyanın Ustetsk, Kraloveqradetsk, Zlin diyarlarında və Filippinin Kapiz əyalətində isə yüksək patogen quş qripi xəstəliyi qeydə alınıb.

Respublika ərazisinin yoluxucu xəstəliklərdən qorunması məqsədilə həmin ərazilərdən WOAH-nin “Quruda yaşayan heyvanların sağlamlıq Məcəlləsi”nə əsasən, zonalaşma prinsipi nəzərə alınmaqla, diri quş və inkubasiya yumurtalarının, quş ətinin, tərkibində quş emalı məhsulları olan quş ətindən və bütün növ quşçuluq məhsulundan alınan hazır ət məhsullarının, quş yemləri və quş üçün yem əlavələrinin, quşların saxlanması, kəsilməsi və emalı üçün istifadə olunmuş avadanlıqların idxalına və ölkə ərazisindən tranzit daşınmasına müvəqqəti məhdudiyyət tətbiq olunub.

Eyni zamanda nəzarət tədbirlərinin gücləndirilməsi məqsədilə Fransanın Yeni Akvitanya regionundan, Rusiyanın Mari El Respublikasından, Avstriyanın Yuxarı Avstriya inzibati ərazi vahidindən, Almaniyanın Meklenburq-Ön Pomeraniya və Bavariya vilayətlərindən, Çexiyanın Ustetsk, Kraloveqradetsk, Zlin diyarlarından və Filippinin Kapiz əyalətindən gələn, yaxud tranzitlə keçən nəqliyyat vasitələri ilə bağlı müvafiq tədbirlərin görülməsi üçün Dövlət Gömrük Komitəsinə müraciət edilib.