logo

Bakıda 29 il əvvəl törədilmiş cinayətin üstü açılıb

11:11 31-10-2022 | icon 1428
Bakıda 29 il əvvəl törədilmiş cinayətin üstü açılıb

Baş Prokurorluq və Daxili İşlər Nazirliyinin birgə həyata keçirdiyi istintaq və əməliyyat-axtarış tədbirləri nəticəsində 29 il əvvəl törədilərək bağlı qalmış xüsusilə ağır cinayətin açılması təmin olunub.

Baş Prokurorluq və Daxili İşlər Nazirliyinin YeniAvropa-ya daxil olan birgə məlumatına görə, 1993-cü il noyabrın 26-da Fikrət İbrahimovun yaşadığı mənzilində odlu silahdan açılmış atəş nəticəsində güllə xəsarətləri ilə meyitinin aşkar edilməsi faktı üzrə Cinayət Məcəlləsinin müvafiq maddələri ilə cinayət işi başlanıb istintaq aparılsa da, cinayəti törətmiş şəxsi müəyyən etmək mümkün olmadığından iş üzrə icraat dayandırılıb.

Nərimanov rayon Prokurorluğu tərəfindən cinayət işi yenidən öyrənildikdən sonra iş üzrə icraat təzələnib.

Prokurorluq və polis orqanlarının həyata keçirdikləri çoxsaylı intensiv istintaq-əməliyyat tədbirləri nəticəsində əldə edilmiş sübutlarla müəyyənləşdirilib ki, 1993-cü il noyabrın 26-da zərərçəkmişin iş yoldaşı olmuş Nazim Bayramov aralarında yaranmış narazılığa görə Fikrət İbrahimovun evinə gedib onunla mübahisə edərkən zərərçəkmişin tapançasını əlindən alıb Fikrət İbrahimovun baş nahiyəsinə atəş açmaqla hadisə yerindən uzaqlaşıb.

Bu il oktyabrın 28-də Nazim Bayramova 2000-ci il sentyabrın 1-dək qüvvədə olmuş Cinayət Məcəlləsinin 94-cü maddəsinin 2-ci bəndi (ağırlaşdırıcı hallarda qəsdən adamöldürmə) və hazırda qüvvədə olan Cinayət Məcəlləsinin 228.1-ci (qanunsuz olaraq odlu silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və ya gəzdirmə) maddələri ilə ittiham elan olunub.

Hazırda cinayət işi üzrə istintaq tədbirləri davam etdirilir.