Gölgöldə ilk dəfə cüdo üzrə Avropa kuboku yarışı keçiriləcək

Azərbaycan ilk dəfə yeniyetmələr arasında cüdo üzrə Avropa kuboku turnirinə ev sahibliyi edəcək. Avropa Cüdo Birliyinin (EJU) rəsmi təqviminə daxil olan yarış gələn il mayın 6-7-də Göygöl Olimpiya İdman Kompleksində keçiriləcək.

YeniAvropa xəbər verir ki, Azərbaycan Cüdo Federasiyasının baş katibi Rəşad Rəsullu ölkəmizin cüdo üzrə dünya çempionatı, “Böyük dəbilqə”, Qran-Pri və digər yarışlara dəfələrlə ev sahibliyi etdiyini deyib. Bildirib ki, növbəti belə yarışımız noyabrın 4-dən 6-dək keçiriləcək “Böyük dəbilqə” yarışı olacaq. Lakin indiyədək Beynəlxalq Cüdo Federasiyası (IJF) və EJU-nun rəsmi təqviminə daxil olan və ölkəmizdə keçirilən beynəlxalq yarışlar adətən Bakıda və böyüklər arasında təşkil edilib.

“Avropa kuboku yarışı regionda təşkil olunacaq ilk rəsmi beynəlxalq statuslu yarış olacaq və yeniyetmələr arasında keçiriləcək. Bu baxımdan, bu yarışın cüdo idman növünün ölkəmizin regionlarında kütləviləşdirilməsi, həmçinin uşaqlar və yeniyetmələr arasında populyarlaşdırılması baxımından mühüm rolu olacaqdır”, - deyə R.Rəsullu əlavə edib.

O, həmçinin bu yarışın yeniyetmələrdən ibarət milli yığmanın üzvlərinin öz peşəkarlıqlarını artırmaları, növbəti il yeniyetmələr arasında Avropa və dünya birinciliklərində iştirak edəcək heyətin müəyyən edilməsi baxımından mühüm rol oynayacağını da qeyd edib.

Qeyd edək ki, turnir bitdikdən sonra yarışda iştirak edəcək ölkələrin idmançılarının iştirakı ilə mayın 8-dən 10-dək beynəlxalq təlim-məşq toplanışı təşkil olunacaq.

Azərbaycan Cüdo Federasiyası növbəti illərdə Göygöl Avropa kuboku yarışının ənənəvi şəkildə təşkil edilməsi, həmçinin gənclər arasında da analoji yarışın ölkəmizdə təşkil edilməsi üçün EJU ilə əməkdaşlıq etməyə davam edəcək.